പാലക്കാട്: ഷൊര്ണൂര് വാണിയംകുളത്ത് നിന്ന് കാണാതായായ കുടുംബം കര്ണാടകയില്.മൈസൂരൂ ചാമരാജ് നഗറില് ദമ്പതികളും മകനും എത്തിയതിന്റെ സിസിടിവി ദൃശ്യങ്ങള് അന്വേഷണ സംഘത്തിന് ലഭിച്ചു. കുടുംബം സഞ്ചരിച്ചിരുന്ന പിക്കപ്പ് വാന് വഴിക്കടവില് ഉപേക്ഷിച്ച നിലയില് കണ്ടെത്തിയിരുന്നു.
കഴിഞ്ഞ 9ന് പുലര്ച്ചെ മുതലാണ് കുടുംബത്തെ കാണാതെ ആയത്. വാണിയംകുളം പനയൂരിലെ ബാബു ഭാസ്കര്, ഭാര്യ രമാദേവി, മകന് വിഷ്ണു എന്നിവരെയാണ് കാണാതായത്. അന്വേഷണത്തിനായി ബാബു ഭാസ്കറിന്റെ മൂത്തമകന് വൈശാഖും കര്ണാടകയില് എത്തി.
ബന്ധുക്കള് ഇവരുടെ ഫോണുകളില് വിളിച്ചിട്ട് കിട്ടാതെ ആയതോടെ അയല്ക്കാരെ വിവരമറിയിക്കുകയായിരുന്നു.അന്വേഷണത്തില് വ്യാഴാഴ്ച പുലര്ച്ചെ ഇവരുടെ പിക്കപ്പ് വാഹനം വീട്ടില് നിന്നും പോകുന്നതിന്റെ സിസിടിവി ദൃശ്യങ്ങള് പൊലീസിന് ലഭിച്ചിരുന്നു.ആ വാഹനമാണ് പിന്നീട് വഴിക്കടവ് ചുരത്തില് നിന്ന് ലഭിച്ചത്.പൊലീസ് നടത്തിയ അന്വേഷണത്തിനൊടുവിലാണ് കുടുംബം കര്ണാടകയിലുണ്ടെന്ന വിവരം ലഭിച്ചിരിക്കുന്നത്. സാമ്പത്തിക പ്രയാസമാണ് ഇവരെ നാടുവിടാന് പ്രേരിപ്പിച്ചതെന്നും സൂചനയുണ്ട്.
