തിരുവനന്തപുരം : ടാള്റോപ്പ് കമ്പനിയിലെ കൂട്ടപിരിച്ചുവിടലില് അഡിഷണല് ലേബര് കമ്മിഷണറുമായി നടത്തിയ ചര്ച്ചയില് തീരുമാനമായില്ല. നഷ്ടത്തില് ആണെന്നതിനാല് കുടിശിക ഉടന് നല്കാനാകില്ലെന്ന് കമ്പനി അധികൃതര് ചര്ച്ചയില് അറിയിച്ചു.തൊഴിലാളികള്ക്ക് 11 മാസത്തോളം ശമ്പള കുടിശിക കമ്പനി നല്കാനുണ്ട്.ഇത് നല്കാന് ഒക്ടോബര് വരെ സമയം വേണമെന്നാണ് കമ്പനിയുടെ ആവശ്യം.
യോഗത്തില് പങ്കെടുക്കാത്ത കമ്പനി ഉടമയ്ക്ക് അഡിഷണല് ലേബര് കമ്മിഷണര് അന്ത്യശാസനം നല്കി.വ്യാഴാഴ്ചത്തെ ചര്ച്ചയില് കമ്പനി സി ഇ ഒ മാത്രമാണ് പങ്കെടുത്തത്. ഈ മാസം 25 ന് മുമ്പ് ഒരു യോഗം ഉണ്ടാകുമെന്നും അന്ന് ഉടമ സഫീര് ഉറപ്പായും പങ്കെടുക്കണം എന്നും അഡിഷണല് ലേബര് കമ്മീഷണര് അന്ത്യശാസനം നല്കി. ഇല്ലെങ്കില് റവന്യു റിക്കവറി ഉള്പ്പടെ നടപടി സ്വീകരിക്കും.
തൊഴിലാളികള്ക്ക് കിട്ടാനുള്ള അനുകൂല്യങ്ങളുടെ വിവരങ്ങള് ശേഖരിക്കാന് എറണാകുളം ലേബര് കമ്മിഷണര്ക്ക് നിര്ദേശം നല്കും.അതേസമയം, ചര്ച്ച തൃപ്തികരമല്ലെന്നാണ് ജീവനക്കാര് പറയുന്നത്. കിട്ടാനുള്ള കുടിശിക മുഴുവനായി കിട്ടണം എന്ന് ജീവനക്കാര് ആവശ്യപ്പെട്ടു.
കേരളത്തില് സിലിക്കണ് വാലി കൊണ്ടുവരുമെന്നും ഐടി ,ഡിജിറ്റല് രംഗങ്ങളില് വന് കുതിച്ചുചാട്ടം ഉണ്ടാക്കുമെന്നും വാഗ്ദാനം ചെയ്താണ് ടാല്റോപ് രംഗത്ത് വന്നത്. എന്നാല് സ്റ്റാര്ട്ടപ്പുകള്ക്ക് പിന്നില് കോടികളുടെ നിക്ഷേപ തട്ടിപ്പ് നടന്നെന്നാണ് ആരോപണം.
