കൊച്ചി: മലയാളികളുടെ പ്രിയനടിയാണ് മഞ്ജു വാര്യര്‍. താരത്തിന് മൃഗങ്ങളോടുള്ള സ്‌നേഹം പല സാഹചര്യങ്ങളില്‍ പങ്കുവച്ചിട്ടുണ്ട്. ഇപ്പോഴിതാ തന്റെ വളര്‍ത്തു നായയുടെ ചിത്രം വരച്ച് നായക്ക് തന്നെ സര്‍പ്രൈസ് നല്‍കിയ വീഡിയോ ആണ് സോഷ്യല്‍ മീഡിയയില്‍ വൈറലാകുന്നത്.
‘ഈ കൊച്ചു കുഞ്ഞിനോട്… ഞങ്ങളുടെ ജീവിതം നീ മാറ്റിമറിച്ച കാര്യം നിനക്കറിയാമെന്ന് ഞാന്‍ പ്രതീക്ഷിക്കുന്നു’.- എന്നാണ് മഞ്ജു ക്യാപ്ഷനായി കുറിച്ചിരിക്കുന്നത്.
താൻ വരച്ച ചിത്രം നായ്‌ക്കുട്ടിയുടെ മുന്നിൽ വച്ച് തന്നെ സർപ്രൈസ് ആയി ഓപ്പൺ ചെയ്യുന്ന ഒരു ക്യൂട്ട് വീഡിയോ ആണ് മഞ്ജു ഇൻസ്റ്റാഗ്രാമിലൂടെ പങ്കുവെച്ചിരിക്കുന്നത്. മഞ്ജുവിന്റെ സഹോദരനും സംവിധായകനുമായ മധു വാര്യരെയും അമ്മയെയും എല്ലാം ഈ വിഡിയോയില്‍ കാണാം. ചിത്രം കാണുമ്പോൾ ക്യാമറയിലേക്ക് നോക്കുന്ന നായ്‌ക്കുട്ടിയുടെ ഭാവവും വീഡിയോയെ കൂടുതൽ ആകർഷകമാക്കുന്നുണ്ട്.
നിരവധി പേരാണ് വിഡിയോയ്‌ക്ക് കമന്റുമായെത്തിയിരിക്കുന്നത്.
അഭിനേത്രി, നർത്തകി, ഗായിക, നിർമ്മാതാവ് എന്നീ നിലകളിലെല്ലാം തന്റെ അസാധ്യ പ്രതിഭ തെളിയിച്ചിട്ടുള്ള താരമാണ് മലയാളികളുടെ പ്രിയപ്പെട്ട ലേഡി സൂപ്പർസ്റ്റാർ മഞ്ജു വാര്യർ. എന്നാൽ, മഞ്ജു വാര്യർ വളരെ മനോഹരമായി പെയിന്റിംഗ് ചെയ്യുന്ന ഒരു ചിത്രക്കാരി കൂടിയാണ് എന്ന കാര്യം അധികമാർക്കും അറിയാത്ത ഒന്നാണ്. മുൻപ് ഒരു വായനാദിനത്തോട് അനുബന്ധിച്ച് മഞ്ജു സോഷ്യൽ മീഡിയയിൽ പങ്കുവച്ച ഒരു പെയിന്റിംഗ് ആണ് അവരിലെ ചിത്രകാരിയെ ആദ്യമായി ലോകത്തിന് മുന്നിൽ വെളിപ്പെടുത്തിയത്.
അന്ന് ആ ചിത്രം കണ്ട് അത്ഭുതപ്പെട്ട നടി റിമ കല്ലിങ്കൽ, “നിങ്ങൾക്ക് ചെയ്യാനറിയാത്ത എന്തെങ്കിലും ഉണ്ടോ അത്ഭുതകരമാംവിധം കഴിവുള്ള ലേഡീ?” എന്നായിരുന്നു പ്രശംസിച്ചത്. എന്നാൽ, “ചക്ക വീണ് മുയൽ ചത്തതാണ്,” എന്നാണ് കുസൃതിയോടെയായിരുന്നു മഞ്ജു അന്ന് റിമയ്‌ക്ക് മറുപടി നൽകിയത്.
https://www.facebook.com/100044175232243/videos/pcb.1618043126344846/1737243610811690
