ഡാളസ്: അര്ജന്റീന-സ്വിറ്റ്സര്ലന്ഡ് മത്സരത്തിനിടെയാണ് ലോക ഫുട്ബോളിലെ ഗോട്ടിനെ മൈതാനത്തും മലയാള സിനിമയിലെ ഗോട്ടിനെ ഗാലറിയിലും കണ്ടത്. അതെ, കളത്തില് മെസി, ഗാലറിയില് സാക്ഷാല് മോഹന്ലാല്. ഫുട്ബോള് ലോകം ഒന്നടങ്കം കാത്തിരുന്ന സ്പെയിന്-ഫ്രാന്സ് ലോകകപ്പ് സെമി ഫൈനല് പോരാട്ടത്തിന് സാക്ഷ്യം വഹിക്കാന് ഡാളസ് സ്റ്റേഡിയത്തിലും മലയാളികളുടെ പ്രിയപ്പെട്ട ലാലേട്ടനെത്തി. ആവേശപ്പോരാട്ടം നേരിട്ട് കാണാന് ഭാര്യ സുചിത്ര, നിര്മാതാവും സഹയാത്രികനുമായ ആന്റണി പെരുമ്പാവൂര് എന്നിവര്ക്കൊപ്പമാണ് മോഹന്ലാല് ഗാലറിയിലെത്തിയത്. ഈ ലോകകപ്പില് ഡാളസ് സ്റ്റഏഡിയത്തിലെ അവസാന മത്സരമായിരുന്നു ഇത്.
70,000-ത്തിലധികം കാണികള് നിറഞ്ഞൊഴുകിയ ഗാലറിയില് ലാലേട്ടന്റെയും ഭാര്യ സുചിത്രയുടെയും സാന്നിധ്യം മലയാളി ആരാധകര്ക്ക് ഇരട്ടി മധുരമായി. നിരവധി മലയാളികളും മത്സരം കാണാനെത്തി. ഇവര്ക്ക് ലാലേട്ടന്റെ സാന്നിധ്യം ആവേശമായി. കന്സാസ് സിറ്റിയില് നടന്ന അര്ജന്റീന-സ്വിറ്റ്സര്ലാന്ഡ് ക്വാര്ട്ടര് ഫൈനല് പോരാട്ടം കാണാന് മോഹന്ലാല് സുഹൃത്തുക്കളൊപ്പമെത്തിയ ചിത്രങ്ങളും വീഡിയോയും വൈറലായിരുന്നു. അന്ന് അര്ജന്റൈന് ടീമിന്റെ എവേ ജേഴ്സിയായിരുന്നു മോഹന്ലാല് ധരിച്ചിരുന്നത്. ഫൈനല് കാണാനും ലാലേട്ടനെത്തുമെന്നാണ് കരുതുന്നത്.
