കൊച്ചി: മലയാള സിനിമാ ചരിത്രത്തിലെ എക്കാലത്തെയും മികച്ച ക്രൈം ത്രില്ലർ ഫ്രാഞ്ചൈസിയായ ‘ദൃശ്യ’ത്തിന് നാലാം ഭാഗം ഉണ്ടാകുമെന്ന് നിർമാതാവ് ആൻ്റണി പെരുമ്പാവൂർ. മഴവിൽ മനോരമയുടെ അവാർഡ് നിശയിലാണ് ആൻ്റണി പെരുമ്പാവൂർ സിനിമയുടെ നാലാം ഭാഗം സംബന്ധിച്ച നിർണായക സ്ഥിരീകരണം നടത്തിയത്. ‘ദൃശ്യത്തിന് ഉറപ്പായും നാലാം ഭാഗം ഉണ്ടാകും, ഇതെന്റെ മനസ്സിൽ നിന്ന് പറയുന്നതാണ്’ എന്നായിരുന്നു വേദിയിൽ വെച്ചുള്ള അദ്ദേഹത്തിന്റെ വാക്കുകൾ.
ചിത്രത്തിന്റെ മൂന്നാം ഭാഗം നേടിയ തകർപ്പൻ വിജയത്തിന് പിന്നാലെയാണ് ആരാധകരെ ആവേശത്തിലാഴ്‌ത്തി നാലാം ഭാഗത്തെക്കുറിച്ചുള്ള പുതിയ പ്രഖ്യാപനം വന്നിരിക്കുന്നത്. മലയാള സിനിമയിൽ പുതിയ ചരിത്രം കുറിച്ച മോഹൻലാൽ – ജീത്തു ജോസഫ് കൂട്ടുകെട്ടിൽ തന്നെയാണ് നാലാം ഭാഗവും ഒരുങ്ങുകയെന്നാണ് സിനിമാ ലോകത്തെ റിപ്പോർട്ടുകൾ സൂചിപ്പിക്കുന്നത്. പ്രഖ്യാപനം വന്നതോടെ സമൂഹമാധ്യമങ്ങളിൽ ആരാധകർ വലിയ ആവേശത്തിലാണ്.
മോഹൻലാൽ – ജീത്തു ജോസഫ് കൂട്ടുകെട്ടിലൊരുങ്ങിയ ദൃശ്യം സീരീസിലെ മുൻ ചിത്രങ്ങൾ ആഗോളതലത്തിൽ വൻ വിജയമാണ് നേടിയത്. ജോർജ്കുട്ടിയും കുടുംബവും തങ്ങളുടെ നിലനിൽപ്പിനായി നടത്തുന്ന പോരാട്ടത്തിന്റെ കഥ പറഞ്ഞ ചിത്രങ്ങൾ മലയാളത്തിന് പുറമെ തമിഴ്, തെലുങ്ക്, ഹിന്ദി, ചൈനീസ്, കൊറിയൻ തുടങ്ങിയ നിരവധി അന്താരാഷ്‌ട്ര ഭാഷകളിലേക്കും റീമേക്ക് ചെയ്യപ്പെട്ടിരുന്നു. ഭാഷാഭേദമന്യേ പ്രേക്ഷകർ ഏറ്റെടുത്ത ഒരു ചിത്രത്തിന്റെ നാലാം വരവിനായി കാത്തിരിക്കുകയാണ് സിനിമാ ലോകം.
