കൊച്ചി: സുഹൃത്തുക്കളുടെ സ്വകാര്യ ദൃശ്യങ്ങൾ സമൂഹമാധ്യമങ്ങളിലൂടെ പ്രചരിപ്പിച്ചെന്ന കേസിൽ യൂട്യൂബർ തൊപ്പി എന്നറിയപ്പെടുന്ന നിഹാദിനെതിരെ പോലീസ് ലുക്ക് ഔട്ട് സർക്കുലർ പുറത്തിറക്കി. വിദേശത്തേക്ക് കടക്കാൻ സാധ്യതയുണ്ടെന്ന വിലയിരുത്തലിനെ തുടർന്നാണ് നടപടി. ഇതിനായി നിഹാദിന്റെ പാസ്‌പോർട്ട് വിവരങ്ങളും പോലീസ് ശേഖരിച്ചിട്ടുണ്ട്. ചോദ്യം ചെയ്യലിന് ഹാജരാകാൻ നോട്ടീസ് നൽകിയിരുന്നെങ്കിലും ആരോഗ്യപ്രശ്നങ്ങൾ ചൂണ്ടിക്കാട്ടി മറുപടി നൽകിയ ശേഷം നിഹാദ് ഒളിവിലായതായി അന്വേഷണ സംഘം അറിയിച്ചു.
കേസുമായി ബന്ധപ്പെട്ട് കഴിഞ്ഞ ദിവസം നിഹാദിന്റെ യൂട്യൂബ് ചാനലും നീക്കം ചെയ്തിരുന്നു. പോലീസ് നൽകിയ റിപ്പോർട്ടിന്റെ അടിസ്ഥാനത്തിലായിരുന്നു നടപടി. ആലുവ റൂറൽ സൈബർ പോലീസാണ് പരാതിയിൽ കേസെടുത്ത് അന്വേഷണം നടത്തുന്നത്. അതേസമയം നിഹാദിന്റെ മുൻകൂർ ജാമ്യാപേക്ഷയെ ശക്തമായി എതിർത്ത പോലീസ്, ഗുരുതര സ്വഭാവമുള്ള കുറ്റകൃത്യങ്ങളാണ് ആരോപിക്കപ്പെടുന്നതെന്നും അതിനാൽ ജാമ്യം അനുവദിക്കരുതെന്നും എറണാകുളം സെഷൻസ് കോടതിയിൽ സമർപ്പിച്ച റിപ്പോർട്ടിൽ വ്യക്തമാക്കി.
ലഹരിമരുന്ന് ഉപയോഗം, അശ്ലീല ഉള്ളടക്ക പ്രചരണം, ലൈംഗിക ചൂഷണം, പോക്സോ നിയമവുമായി ബന്ധപ്പെട്ട ആരോപണങ്ങൾ എന്നിവയാണ് നിഹാദിനും അദ്ദേഹവുമായി ബന്ധപ്പെട്ടവർക്കുമെതിരെ ഉയർന്നിരിക്കുന്നത്. അഡ്വ. ശ്രീജിത്ത് പെരുമന നൽകിയ പരാതിയെ തുടർന്നാണ് ഡിജിപി റവാഡ ചന്ദ്രശേഖർ അന്വേഷണത്തിന് ഉത്തരവിട്ടത്. ഇതിനിടെ നിഹാദിന്റെ എംആർസെഡ് ഗ്യാങ്ങിലെ മുൻ അംഗങ്ങളായ മുഹമ്മദ് (മമ്മു), ഷമീർ എന്നിവർ നിഹാദിനെതിരെ ഗുരുതര ആരോപണങ്ങളുമായി രംഗത്തെത്തിയിരുന്നു. എംഡിഎംഎ ഉപയോഗം, പ്രായപൂർത്തിയാകാത്തവരെ ചൂഷണം ചെയ്യൽ, ലൈംഗികാതിക്രമം തുടങ്ങിയ ആരോപണങ്ങളാണ് ഇവർ ഉന്നയിച്ചത്. നിഹാദിന്റെ മുറിയിൽ നിന്ന് കഞ്ചാവ് പാക്കറ്റ് പുറത്തെടുക്കുന്നതായി കാണിക്കുന്ന വീഡിയോയും സമൂഹമാധ്യമങ്ങളിൽ പ്രചരിച്ചിരുന്നു.
മറ്റൊരു കേസിൽ, ലൈവ് സ്ട്രീമിനിടെ സ്ത്രീത്വത്തെ അപമാനിക്കുന്ന തരത്തിൽ പരാമർശം നടത്തിയെന്ന പരാതിയിൽ നിഹാദിന്റെ കൂട്ടാളിയായ മുഹമ്മദ് എന്ന മമ്മുവിനെ മഞ്ചേരി പോലീസ് അറസ്റ്റ് ചെയ്തിരുന്നു. കോഴിക്കോട് സ്വദേശിനിയുടെ പരാതിയിലായിരുന്നു നടപടി. ജൂൺ 10‑ന് നടന്ന യൂട്യൂബ് ലൈവിനിടെയുണ്ടായ പരാമർശങ്ങളാണ് കേസിന് ആധാരം. യുവതിയുടെ പരാതിയിൽ മമ്മുവിന് പുറമേ നിഹാദ്, ഷമീർ എന്നിവരുള്‍പ്പെടെ നാല് പേർക്കെതിരെയാണ് കേസ് രജിസ്റ്റർ ചെയ്തിരിക്കുന്നത്. തുടർന്ന് നടത്തിയ അന്വേഷണത്തിൽ മമ്മുവിനെ അറസ്റ്റ് ചെയ്ത് മഞ്ചേരി കോടതിയിൽ ഹാജരാക്കുകയും റിമാൻഡ് ചെയ്യുകയും ചെയ്തു. സമാന സ്വഭാവമുള്ള മറ്റൊരു പരാതിയുടെ അടിസ്ഥാനത്തിൽ ആലുവ പോലീസും നിഹാദിനും മമ്മുവിനുമെതിരെ പ്രത്യേക കേസ് രജിസ്റ്റർ ചെയ്ത് അന്വേഷണം തുടരുകയാണ്.
