കൊച്ചി:ആലുവയിലെ ഹോട്ടലുകളില് നഗരസഭ ആരോഗ്യവിഭാഗത്തിന്റെ മിന്നല് പരിശോധനയില് പുഴുവരിച്ച ബിരിയാണിയും പഴകിയ ഭക്ഷണസാധനങ്ങളും പിടിച്ചെടുത്തു.പ്രമുഖ ഹോട്ടലുകളില് നിന്നാണ് ഇത്തരം ഭക്ഷ്യയോഗ്യമല്ലാത്ത ഭക്ഷണസാധനങ്ങള് പിടിച്ചെടുത്തത്.
ആലുവ ദേശീയ പാതയില് പറവൂര് കവലയിലെ ബിരിയാണി മഹല്, നൂര്ജഹാന്, കമ്മത്ത് ഇന് എന്നീ ഹോട്ടലുകളില് നിന്നാണ് പഴകിയതും ആരോഗ്യത്തിന് ഹാനികരവുമായ ഭക്ഷണപദാര്ഥങ്ങള് നഗരസഭ അധികൃതര് പിടിച്ചെടുത്തത്.തലേദിവസത്തെ ബിരിയാണി, പഴകിയ പാല്, ഗുണനിലവാരമില്ലാത്ത പാചക എണ്ണ, പഴകിയ ബീഫ് കറി, ചിക്കന് എന്നിവ പിടിച്ചെടുത്തു.രാവിലെയായിരുന്നു ആലുവ നഗരസഭ ആരോഗ്യ വിഭാഗം സ്ക്വാഡ് മിന്നല് പരിശോധന നടത്തിയത്.
പൊതുജനാരോഗ്യത്തിന് ഭീഷണിയാകുന്ന രീതിയില് പ്രവര്ത്തിച്ച ഹോട്ടലുകള്ക്കെതിരെ കര്ശനമായ നിയമനടപടികള് സ്വീകരിക്കുമെന്ന് കോര്പറേഷന് അധികൃതര് അറിയിച്ചു.വരും ദിവസങ്ങളിലും പരിശോധന തുടരും.
