ജൂലൈ 21 വരെ ഓണ്ലൈനായി അപേക്ഷിക്കാം
യോഗ്യത- എംബിബിഎസ് ബിരുദവും ഒരുവര്ഷത്തെ ഇന്റേണ്ഷിപ്പും
വിശദവിവരങ്ങള് https://natboard.edu.in ല്
അഖിലേന്ത്യാ മെഡിക്കല് പോസ്റ്റ് ഗ്രാഡുവേറ്റ് (പിജി) കോഴ്സുകളിലേക്കുള്ള നാഷണല് എലിജിബിലിറ്റി-കം-എന്ട്രന്സ് ടെസ്റ്റ് (നീറ്റ്-പിജി 2026) ഓഗസ്റ്റ് 30 ന് നടത്തും. നാഷണല് ബോര്ഡ് ഓഫ് എക്സാമിനേഷന്സ് ആണ് പരീക്ഷ സംഘടിപ്പിക്കുന്നത്. അംഗീകൃത എംബിബിഎസ് ബിരുദവും എന്എംസി/എസ്എംസി രജിസ്ട്രേഷന് സര്ട്ടിഫിക്കറ്റും ഉള്ളവര്ക്ക് പരീക്ഷക്ക് അപേക്ഷിക്കാം. 2026 സെപ്തംബര് 30 നകം ഒരുവര്ഷത്തെ ഇന്റേണ്ഷിപ്പ് പൂര്ത്തിയാക്കണം. ഫോറിന് മെഡിക്കല് ഗ്രാഡുവേറ്റ് എക്സാമിനേഷന് (എഫ്എംജിഇ സ്ക്രീനിങ് ടെസ്റ്റ്) പാസായി മെഡിക്കല് കൗണ്സിലില് രജിസ്റ്റര് ചെയ്തിട്ടുള്ളവരെയും പരിഗണിക്കും. ‘നീറ്റ്-പിജി 2026’ വിജ്ഞാപനവും ബ്രോഷറും https://natboard.edu.in ല് ലഭ്യമാണ്.
പരീക്ഷാ ഫീസ്, ജനറല്, ഒബിസി, ഇഡബ്ല്യുഎസ് വിഭാഗങ്ങള്ക്ക് 3500 രൂപയും പട്ടികജാതി/വര്ഗ്ഗം, ഭിന്നശേഷി വിഭാഗങ്ങള്ക്ക് 2500 രൂപയുമാണ്. ക്രഡിറ്റ്/ഡബിറ്റ കാര്ഡ്, യുപിഐ മുഖേന ഫീസ് അടയ്ക്കാം. ജൂലൈ 21 വരെ ഓണ്ലൈനില് അപേക്ഷിക്കാവുന്നതാണ്. ഒറ്റ അപേക്ഷ നല്കിയാല് മതി. അപേക്ഷിക്കേണ്ട രീതി ഇന്ഫര്മേഷന് ബ്രോഷറിലുണ്ട്.
കമ്പ്യൂട്ടര് അധിഷ്ഠിത നീറ്റ്-പിജി പരീക്ഷയില് മെഡിക്കല് കരിക്കുലം ആസ്പദമാക്കിയുള്ള വിഷയങ്ങളില് 180 മള്ട്ടിപ്പിള് ചോയിസ് ചോദ്യങ്ങളുണ്ടാവും. ശരി ഉത്തരത്തിന് 4 മാര്ക്ക്. ഉത്തരം തെറ്റിയാല് ഓരോ മാര്ക്ക് വീതം കുറയ്ക്കും. മൂന്നര മണിക്കൂര് സമയം ലഭിക്കും. ഓഗസ്റ്റ് 30 ന് രാവിലെ 9-12.30 മണിവരെയാണ് പരീക്ഷ. അഡ്മിറ്റ് കാര്ഡുകള് 27 ന് ലഭിക്കും. പരീക്ഷാ ദിവസം രാവിലെ 7 മുതല് 8.30 മണിവരെ മാത്രമേ പരീക്ഷാകേന്ദ്രങ്ങളില് പ്രവേശനമുള്ളൂ. പരീക്ഷാ ഫലം സെപ്തംബര് 30 ന് പ്രസിദ്ധീകരിക്കും. പരീക്ഷാ ഘടനയും സിലബസും മൂല്യനിര്ണയരീതിയുമൊക്കെ വെബ്സൈറ്റില് ലഭിക്കും.
നീറ്റ്-പിജി 2026 റാങ്ക് അടിസ്ഥാനത്തില് എംഡി/എംഎസ്/പിജി ഡിപ്ലോമ/ഡിഎന്ബി/ഡോ.എന്ബി/എന്ബിഇഎംഎസ് ഡിപ്ലോമ കോഴ്സുകളില് പ്രവേശനം തേടാം. 50 ശതമാനം ഓള് ഇന്ത്യാ ക്വാട്ടാ സീറ്റുകളിലും സ്റ്റേറ്റ് ക്വാട്ടാ സീറ്റുകളിലും സ്വകാര്യ മെഡിക്കല് കോളേജുകള്/കല്പിത സര്വ്വകലാശാലകള്, ആംഡ് ഫോഴ്സസ് മെഡിക്കല് സര്വ്വീസസ് സ്ഥാപനങ്ങള്, സര്വ്വകലാശാലകള് എന്നിവിടങ്ങളിലെ സീറ്റുകളിലും പ്രവേശനത്തിന് അര്ഹതയുണ്ടായിരിക്കും.
ന്യൂദല്ഹി അടക്കമുള്ള എയിംസുകള്, ജിപ്മെര്, പിജിമെര്, നിംഹാന്സ്, ശ്രീചിത്ര എന്നിവിടങ്ങളിലെ മെഡിക്കല് പിജി പ്രവേശനം നീറ്റ്-പിജിയുടെ പരിധിയില്പ്പെടില്ല.
