മയാമി: എട്ട് വര്‍ഷത്തെ ഇടവേളയ്‌ക്ക് ശേഷം ലോകകപ്പ് ഫുട്ബോള്‍ സെമിബെര്‍ത്തിനായി ഇംഗ്ലണ്ട്. ഹാരി കെയ്ന്‍ നയിക്കുന്ന തോമസ് ടുഷേലിന്റെ ഇംഗ്ലണ്ടിനെ തടയാന്‍ ലോകകപ്പ് വഴിയില്‍ കാത്ത് നില്‍ക്കുന്നത് എര്‍ലിങ് ഹാലന്‍ഡ്. നാളെ പുലര്‍ച്ചെ 2.30ന് മയാമിയിലാണ് മത്സരം. അച്ചടക്കത്തോടെയുള്ള പോരാട്ടവും പഴുതു കണ്ടെത്താന്‍ ക്ഷമയോടെ കാത്തിരിന്നു ആക്രമിച്ച് കീഴടക്കുന്ന ശൈലിയുമായാണ് നോര്‍വേ ഈ ലോകകപ്പില്‍ മുന്നേറിക്കൊണ്ടിരിക്കുന്നത്. ടോട്ടല്‍ ഫുട്ബോളിന്റെ നിര്‍വചനം ഗംഭീരമായി നിറവേറ്റിവരുന്ന ഇംഗ്ലണ്ട് അച്ചടക്കത്തിനൊപ്പം ആക്രമണോത്സുകമായി പൊരുതിക്കയറുന്ന ടീം കൂടിയാണ്.
പരമാവധി സമയം പന്ത് കൈവശം വച്ച് പോരാടി കയറുന്ന രീതിയാണ് നോര്‍വേയുടേത്. അമിത പ്രതിരോധത്തിലേക്ക് കടന്നാല്‍ ഈ ടീമില്‍ നിന്ന് ഏത് സമയവും ഭീകരമായോരു അപകടം പ്രതീക്ഷിക്കാം. ലോകം കണ്ടെ ഏറ്റവും മികച്ച ഫിനിഷര്‍മാരില്‍ ഒരാളായ എര്‍ലിങ് ഹാലന്‍ഡ് ആണ് നോര്‍വേയുടെ പ്രധാന സ്ട്രൈക്കര്‍.
ഗ്രൂപ്പ് ഐയില്‍ നിന്ന് രണ്ടാം സ്ഥാനക്കാരായണ് നോര്‍വേ നോക്കൗട്ടിലേക്ക് കടന്നത്. പ്രാഥമിക റൗണ്ടില്‍ ഫ്രാന്‍സിനോട് മാത്രമാണ് പരാജയപ്പെട്ടത്. ഈ മത്സരത്തില്‍ പ്രമുഖ താരങ്ങളെല്ലാം വിശ്രമത്തിലിരിക്കുകയായിരുന്നു. റൗണ്ട് ഓഫ് 32 പോരാട്ടത്തില്‍ ഐവറി കോസ്റ്റിനെ 2-1ന് തോല്‍പ്പിച്ച നോര്‍വേ പ്രീക്വാര്‍ട്ടറില്‍ ബ്രസീലിനെയും അതേ സ്‌കോറില്‍ കീഴടക്കി.
നോര്‍വേ ലോകകപ്പ് ചരിത്രത്തില്‍ ആദ്യമായണ് നോക്കൗട്ട് മത്സരം ജയിക്കുന്നത്. ഇതിന് മുമ്പ് 1998ല്‍ മാത്രമാണ് നോക്കൗട്ട് ബെര്‍ത്ത് കളിച്ചിട്ടുള്ളത്. അന്ന് പ്രീക്വാര്‍ട്ടറില്‍ തോറ്റ് പുറത്താകുകയും ചെയ്തു.
കൃത്യമായ ആസൂത്രണത്തോടെ പൊരുതിക്കയറുന്ന നോര്‍വേ ഇംഗ്ലണ്ടിന് വലിയ വെല്ലുവിളിയായിരിക്കും. മദ്ധ്യനിരയില്‍ നിന്ന് തന്നെ ആക്രമണം ശക്തമാക്കി മുന്നേറാനുള്ള മികവാണ് ഇംഗ്ലണ്ടിന് തുണയാകുന്നത്. നോര്‍വേയ്‌ക്കെതിരെ ഇംഗ്ലണ്ട് മുന്നേറ്റം എത്രത്തോളം ശക്തമാകുമെന്നാണ് ഇന്നത്തെ ഈ മത്സരത്തില്‍ അറിയാനുള്ളത്.
