തിരുവനന്തപുരം: പിഎസ്സി പരീക്ഷാ ക്രമക്കേടുമായി ബന്ധപ്പെട്ട് അന്വേഷണം ക്രൈംബ്രാഞ്ചിന് വിട്ടതോടെ ഉദ്യോഗാര്ത്ഥികളുടെ പരാതി പ്രളയം. ക്രമക്കേട് അന്വേഷിക്കുന്ന ഐജി അജിതാ ബീഗത്തിന് രണ്ട് ദിവസത്തിനകം നിരവധി പരാതികളാണ് ലഭിച്ചത്.
അടുത്തിടെ ഉയര്ന്ന പരാതികളാണ് ആദ്യം അന്വേഷിക്കുന്നത്. പ്ലാനിങ് ബോര്ഡ് ചീഫ് തസ്തികയിലേക്കുള്ള പരീക്ഷ, ഡിവൈഎസ്പി സ്പെഷല് റിക്രൂട്ട്മെന്റ്, കെഎഎസ് തുടങ്ങി അന്വേഷിക്കേണ്ട പരീക്ഷളുടെ പട്ടിക എസ്ഐടി തയ്യാറാക്കിയിട്ടുണ്ട്.
അതേസമയം കോടതികളുടെ പരിഗണനയിലുള്ള പരാതികള് ഈ ഘട്ടത്തില് പരിഗണിക്കില്ല. ഓരോ ദിവസവും പുതിയ ആരോപണങ്ങള് ഉയരുന്നതു കണക്കിലെടുത്ത് വിശദമായ പ്രാഥമിക അന്വേഷണത്തിനു ശേഷം മാത്രം തുടര് നടപടികള് എന്ന നിലപാടാണ് ക്രൈംബ്രാഞ്ചിനുള്ളത്.
തിങ്കളാഴ്ചക്കുള്ളില് രേഖകള് ആവശ്യപ്പെട്ട് പിഎസ്സിക്കു കത്തു നല്കും. പരീക്ഷയുമായും നിയമനവുമായും ബന്ധപ്പെട്ട എല്ലാ വിവരങ്ങളും നല്കണമെന്ന് ആവശ്യപ്പെടും. പരാതിക്കാരുടെ മൊഴിയും പിഎസ്സി നല്കുന്ന രേഖകളും വിശദമായി പരിശോധിച്ച് ഏതെങ്കിലും തരത്തിലുള്ള ക്രമക്കേട് നടന്നുവെന്ന് ബോധ്യപ്പെടുന്ന സാഹചര്യത്തില് എഫ്ഐആര് റജിസ്റ്റര് ചെയ്ത് തുടര്നടപടികളിലേക്കു പോകുമെന്നാണ് ക്രൈംബ്രാഞ്ച് സംഘം വ്യക്തമാക്കുന്നത്.
അന്വേഷണ സംഘത്തില് എസ്പി സക്കറിയ മാത്യു, ഡിവൈഎസ്പി ജി. അജയ്നാഥ് എന്നിവരുമുണ്ട്. ക്രൈംബ്രാഞ്ച് എഡിജിപി എച്ച്. വെങ്കടേഷിനാണ് മേല്നോട്ടച്ചുമതല.
