കോട്ടയം: ഡിവൈഎഫ്ഐ ജില്ലാ സമ്മേളനത്തില് സിപിഎം നേതൃത്വത്തിനെതിരെ ശക്തമായ വിമര്ശനം. മുന് മുഖ്യമന്ത്രി പിണറായി വിജയന്, സംസ്ഥാന സെക്രട്ടറി എം.വി. ഗോവിന്ദന് തുടങ്ങിയവര്ക്കെതിരെയാണ് പ്രധാനമായും വിമര്ശനം.
മൈക്ക് വിഷയം, വീട്ടില്പ്പോയി ചോദിക്ക് എന്ന പരാമര്ശം തുടങ്ങിയ പിണറായി വിജയന്റെ പരാമര്ശങ്ങള് നിയമസഭാ തെരഞ്ഞെടുപ്പില് വലിയ തിരിച്ചടിയുണ്ടാക്കിയെന്ന് പ്രതിനിധികള് ചൂണ്ടിക്കാട്ടി.35 വയസായ മേഖലാ ഭാരവാഹികളെ മാറ്റാന് തിടുക്കംകാണിക്കുന്ന നേതൃത്വമാണ് 46 വയസായിട്ടും എ.എ. റഹീമിനെ ഡിവൈഎഫ്ഐയില്ത്തന്നെ തുടരാന് അനുവദിക്കുന്നതെന്നും വിമര്ശനമുണ്ടായി.
നിയമസഭാ തെരഞ്ഞെടുപ്പ് പരാജയത്തിന് പ്രധാന കാരണക്കാര് പിണറായിയും എം.വി. ഗോവിന്ദനും കെ.കെ. രാഗേഷുമാണെന്നാണ് പ്രതിനിധികള് വിമര്ശിച്ചത്. പിണറായിയുടെ ധാര്ഷ്ട്യവും പരാജയത്തിന് കാരണമാണ്. മൈക്ക് ഓപ്പറേറ്റര്മാരോട് പ്രതികരിക്കുന്ന രീതി, ‘വീട്ടില്പ്പോയി ചോദിക്ക്’ എന്ന പരാമര്ശം പാര്ട്ടിക്കും മുന്നണിക്കും അവമതിപ്പുണ്ടാക്കി.എം.വി. ഗോവിന്ദന് ആളുകള്ക്ക് മനസിലാകുന്ന ഭാഷയിലല്ല സംസാരിക്കുന്നത്.
എംവി ഗോവിന്ദന്റെയും കെകെ രാഗേഷിന്റെയും പ്രവര്ത്തനഫലമായാണ് കണ്ണൂരിലെ പാര്ട്ടി കോട്ടകളില്പ്പോലും പരാജയപ്പെട്ടത്. ജില്ലാ സെക്രട്ടറിയെന്ന നിലയില് രാഗേഷ് പൂര്ണ പരാജയമാണ്.
