ന്യൂദല്ഹി: ലൈംഗികാതിക്രമത്തെക്കുറിച്ച് ഒരു കുട്ടിയില് നിന്ന് നേരിട്ട് വിവരം ലഭിക്കുന്ന ആര്ക്കും പോക്സോ നിയമ പ്രകാരം അധികാരികളെ അറിയിക്കാന് ബാധ്യതയുണ്ടെന്നും അതില് കാലതാമസം വരുത്താന് കഴിയില്ലെന്നും സുപ്രീം കോടതി.
പോക്സോ നിയമത്തിലെ സെക്ഷന് 19 പ്രകാരം ഇരയായ കുട്ടിയില് നിന്ന് നേരിട്ട് ലഭിക്കുന്ന വിവരങ്ങള് വിശ്വസനീയമായി കണക്കാക്കണം. അതു ലഭിക്കുന്ന വ്യക്തി സ്ഥിരീകരണം തേടാന് കാത്തിരിക്കരുതെന്നും ഉടന്പോലീസില് റിപ്പോര്ട്ട് ചെയ്യണമെന്നും ജസ്റ്റിസുമാരായ മനോജ് മിശ്ര , കെ.വി. വിശ്വനാഥന് എന്നിവരടങ്ങിയ ബെഞ്ച് പറഞ്ഞു.
സംഭവം പൊലീസില് അറിയിക്കുന്നതിനു മുമ്പ് സ്ഥിരീകരണത്തിനായി അന്വേഷണം നടത്താന് പോയാല് കുറ്റകൃത്യത്തിന്റെ തെളിവുകള് നഷ്ടമാവാനും പ്രതി രക്ഷപ്പെടാനും സാധ്യതയുണ്ടെന്ന് കോടതി പറഞ്ഞു.
അരുണാചല് പ്രദേശിലെ ഒരു സ്കൂളില് നടന്ന ലൈംഗികാതിക്രമത്തെക്കുറിച്ച് ഒരു കുട്ടിയില് നിന്ന് നേരിട്ട് കേട്ടിട്ടും ബന്ധപ്പെട്ട അധികാരികളെ ഇക്കാര്യം അറിയിക്കുന്നതില് പരാജയപ്പെട്ട ഹെഡ്മിസ്ട്രസിനെതിരെ ക്രിമിനല് നടപടികള് പുനഃസ്ഥാപിച്ചുകൊണ്ടാണ് കോടതി ഈ നിരീക്ഷണങ്ങള് നടത്തിയത്.
