കൊച്ചി: അടുത്ത തീര്ത്ഥാടന കാലം മുതല് ശബരിമലയിലും അനുബന്ധ പ്രദേശങ്ങളിലും പണം തന്നില്ലെങ്കില് ആരോഗ്യവകുപ്പിന്റെ സേവനം നല്കില്ലെന്ന ഡയറക്ടറുടെ തീരുമാനം ധിക്കാരപരമെന്ന് വിഎച്ച്പി സംസ്ഥാന ജനറല് സെക്രട്ടറി അഡ്വ. അനില് വിളയില്.
വര്ഷങ്ങളായി തീര്ത്ഥാടനകാലത്തും മാസപൂജാസമയത്തും സൗജന്യമായി സേവനം നല്കുന്ന ആരോഗ്യവകുപ്പിന്റെ ജീവനക്കാര്ക്ക് ഇനി മുതല് പണം നല്കണമെന്നാണ് ആവശ്യപ്പെട്ടിരിക്കുന്നത്. ഇല്ലെങ്കില് ഇത്തരത്തിലുള്ള സേവനങ്ങള് നിര്ത്തിവയ്ക്കുമെന്ന കത്ത് ധിക്കാരപരമാണ്. ദേവസ്വം ബോര്ഡിന് മെയ് മാസത്തില് നല്കിയ കത്തിലാണ് ഇക്കാര്യം പറയുന്നത്. ആരോഗ്യ വകുപ്പ് ഡയറക്ടറുടെ തീരുമാനം ഉടന് തന്നെ സര്ക്കാര് പിന്വലിക്കണം. സര്ക്കാര് ഇതിന് തയാറായില്ലെങ്കില് മറ്റ് സേവന സംഘടനകളുമായി ചേര്ന്ന് ഡോക്ടര്മാരുടെയും ആരോഗ്യ പ്രവര്ത്തകരുടേയും സേവനം ശബരിമലയിലും അനുബന്ധ പ്രദേശങ്ങളിലും ഒരുക്കാന് വിഎച്ച്പി തയാറാണ്. അതിനാവശ്യമായ സ്ഥലസൗകര്യങ്ങള് നല്കാന് സര്ക്കാര് ബാധ്യസ്ഥരാണെന്നും അദ്ദേഹം ചൂണ്ടിക്കാട്ടി.
ഓരോ മണ്ഡല കാലത്തും കോടിക്കണക്കിന് രൂപയുടെ വരുമാനം സംസ്ഥാനത്തിന് നല്കുന്ന ശബരിമലയോട് കാണിക്കുന്ന ഈ നടപടി തീര്ത്തും അപലപനീയമാണ്. ദേവസ്വം മന്ത്രിയും ആരോഗ്യ മന്ത്രിയും ഒരാളായിരിക്കുന്ന ഈ സര്ക്കാരിലെ ഈ തീരുമാനത്തിന്റെ പിറകില് പ്രത്യേകമായ ഉദ്ദേശ്യലക്ഷ്യങ്ങളുണ്ടെന്ന് സംശയിക്കുന്നു. കൃത്യമായ രീതിയില് വര്ഷങ്ങളായി തുടര്ന്ന് വരുന്ന ആരോഗ്യവകുപ്പിന്റെ സേവനത്തെ ഇല്ലാതാക്കാന് കെ. മുരളീധരന് തീരുമാനമെടുത്തത് ആരോഗ്യമന്ത്രി എന്ന രീതിയിലാണോ ദേവസ്വം മന്ത്രി എന്ന രീതിയിലാണോ എന്ന് പൊതുസമൂഹത്തിനെയും ഹിന്ദു സമൂഹത്തെയും ബോധ്യപ്പെടുത്തണം, വിഎച്ച്പി ആവശ്യപ്പെട്ടു.
ശബരിമല തീര്ത്ഥാടനകാലത്ത് സൗജന്യ ഗതാഗത സേവനം നല്കാമെന്ന് വിഎച്ച്പി പറഞ്ഞിട്ടും അതിന് അംഗീകാരം നല്കാതെ സുപ്രീംകോടതിയില് കേസുമായി പോയ സര്ക്കാര് സംവിധാനമാണ് ഇത്തരത്തിലുള്ള ആരോഗ്യപരമായ സേവനങ്ങള് നിര്ത്തുമെന്ന് വെല്ലുവിളിക്കുന്നത്. ഹിന്ദു സമൂഹത്തിനെതിരെ ഏതുതരത്തിലുള്ള വെല്ലുവിളിയും നടത്താം എന്നുള്ള സര്ക്കാര് നയം തിരുത്തേണ്ടതാണ്. ഹജ്ജ് തീര്ത്ഥാടകര്ക്ക് ഉള്പ്പെടെ എല്ലാവിധ സൗകര്യങ്ങളും ഒരുക്കി നല്കുന്ന സര്ക്കാര് ഹിന്ദുക്കളോട് കാണിക്കാന് ഉദ്ദേശിക്കുന്ന അവഗണനയുടെ ആദ്യ സൂചനയാണ് ഈ ഉത്തരവ്.
ആരോഗ്യ വകുപ്പ് ഡയറക്ടര് നല്കിയ കത്ത് ഉടന് പിന്വലിക്കുകയും വര്ഷങ്ങളായി തുടര്ന്നുവരുന്ന ആരോഗ്യവകുപ്പിന്റെ സേവനം പൂര്വാധികം ശക്തമായി നടപ്പാക്കുകയും വേണം. അല്ലാത്തപക്ഷം വിഎച്ച്പി സമാന സംഘടനകളുമായി ചേര്ന്ന് ആരോഗ്യപ്രവര്ത്തകരുടെ സേവനം ശബരിമലയിലും അനുബന്ധപ്രദേശങ്ങളിലും നല്കാന് തയാറാകും. അതിന് ആവശ്യമായ സൗകര്യവും അനുവാദവും സര്ക്കാര് നല്കാന് ബാധ്യസ്ഥരാകണമെന്നും അദ്ദേഹം ആവശ്യപ്പെട്ടു.
