ഗുവാഹതി: അസമിൽനിന്ന് ബംഗ്ലാദേശികളെ എല്ലാം പുറത്താക്കുന്നുവെന്ന തരത്തിൽ നടക്കുന്നത് കുപ്രചാരണങ്ങൾ ആണെന്ന് വ്യക്തമാകുന്നു. വ്യാജവാർത്തകൾ നിഷേധിച്ചുകൊണ്ട് സംസ്ഥാന നിയമസഭയിൽ സർക്കാർ നൽകിയ ആധികാരിക വിവര പ്രകാരം കാര്യങ്ങൾ ഇങ്ങനെയാണ്.
2021 മുതലുള്ള അഞ്ച് വർഷത്തിനിടെ 36,000-ത്തിലധികം പേരെ വിദേശികളായി പ്രഖ്യാപിച്ചിട്ടുണ്ടെന്നും അവരിൽ 196 പേരെ മാത്രമേ ഇതുവരെ ബംഗ്ലാദേശിലേക്ക് തിരിച്ചയച്ചിട്ടുള്ളൂവെന്നും സർക്കാർ നിയമസഭയെ അറിയിച്ചു.
2021 മുതൽ 2026 മെയ് വരെ ആകെ 36,358 പേരെ വിദേശികളായി ഫോറിനേഴ്സ് ട്രൈബ്യൂണലുകൾ (എഫ്ടി) പ്രഖ്യാപിച്ചിട്ടുണ്ടെന്ന് അതിർത്തി സംരക്ഷണ വികസന മന്ത്രി അതുൽ ബോറ, കോൺഗ്രസ് എംഎൽഎ മോഹിബുർ റോഹ്മാന്റെ ചോദ്യത്തിന് രേഖാമൂലം നൽകിയ മറുപടിയിൽ പറഞ്ഞു. ‘അവരിൽ 196 പേരെ അസമിൽ നിന്ന് ബംഗ്ലാദേശിലേക്ക് തിരിച്ചയച്ചിട്ടുണ്ട്,’ അദ്ദേഹം കൂട്ടിച്ചേർത്തു. വർഷം തിരിച്ചുള്ള കണക്കുകൾ നൽകിക്കൊണ്ട്, 2021 ൽ 7,151 പേരെ വിദേശികളെ പ്രഖ്യാപിച്ചതായും തുടർന്ന് 2022 ൽ 9,028, 2023 ൽ 6,859, 2024 ൽ 6,178, 2025 ൽ 5,106, 2026 ൽ എന്നിങ്ങനെ ആകെ 2036 പേരെയാണ് വിദേശികളായി സൂക്ഷ്മതലത്തിൽ രേഖകൾ പരിശോധിച്ച് കണ്ടെത്തിയതെന്ന് ബോറ പറഞ്ഞു.
നിയമപരമായ വ്യവസ്ഥകൾ അനുസരിച്ച്, വിദേശ ട്രൈബ്യൂണലുകൾക്ക് മാത്രമേ അസമിൽ ഒരാളെ വിദേശിയായി പ്രഖ്യാപിക്കാൻ കഴിയൂ, തുടർന്ന് വിധി അനുകൂലമല്ലെങ്കിൽ ഉയർന്ന കോടതികളെ സമീപിക്കാം. അസം കരാർ അനുസരിച്ച്, 1971 മാർച്ച് 25-നോ അതിനുശേഷമോ അസമിലേക്ക് വരുന്ന എല്ലാ വിദേശികളുടെയും പേരുകൾ കണ്ടെത്തി വോട്ടർ പട്ടികയിൽ നിന്ന് ഇല്ലാതാക്കുകയും അവരെ നാടുകടത്താൻ നടപടികൾ സ്വീകരിക്കുകയും ചെയ്യുമെന്നും മന്ത്രി സർക്കാർ നിലപാട് പറഞ്ഞു.
