പശ്ചിമേഷ്യന്‍ യുദ്ധം: ആഡംബര കപ്പല്‍ ടൂറിസത്തില്‍ കൊച്ചി തുറമുഖത്തിന് തിരിച്ചടി

മട്ടാഞ്ചേരി: പശ്ചിമേഷ്യന്‍ യുദ്ധവും യുറോപ്യന്‍ പ്രതിസന്ധിയും കൊച്ചിയുടെ ആഡംബര ടൂറിസം വിനോദ സഞ്ചാരത്തിന് കനത്ത പ്രഹരമായി. തുറമുഖ അതോറിറ്റിക്കും അനുബന്ധ ടൂറിസം മേഖലയ്‌ക്കുമായി നഷ്ടം 50- 60 കോടിയിലേറെ രൂപയാണെന്നാണ് വിലയിരുത്തല്‍. ഒപ്പം രണ്ടായിരത്തിലെറെ തൊഴിലവസരവും നഷ്ടമായി. ആഡംബര കപ്പല്‍ വിനോദ സഞ്ചാര മേഖല (ക്രൂയിസ് ടൂറിസം) യില്‍ 2025- 26 സീസണില്‍ കൊച്ചി തുറമുഖത്ത് എത്തിയത് 14 കപ്പലുകള്‍ മാത്രമാണ്. യാത്രക്കാര്‍ 10,000ത്തിലും താഴെയും. നവംബര്‍ മുതല്‍ മെയ് വരെയാണ് ആഗോള ക്രൂയിസ് ടൂറിസം സീസണ്‍കാലം. ഭാരതത്തില്‍ കൊച്ചി, മംഗലാപുരം, ഗോവ, മുംബൈ, തുത്തുക്കുടി, ചെന്നൈ എന്നിവയടങ്ങുന്ന ആറ് മേജര്‍ തുറമുഖങ്ങളിലാണ് ക്രൂയിസ് കപ്പലുകളെത്തുന്നത്.

കൊറോണയ്‌ക്ക്‌ശേഷം ഉണരുന്ന ആഡംബര കപ്പല്‍ വിനോദ സഞ്ചാരമേഖലയ്‌ക്ക് യുദ്ധവും തുടര്‍സ്ഥിതിയും വന്‍ തിരിച്ചടിയാണുണ്ടാക്കിയത്. ക്രൂയിസ് ടൂറിസം തളര്‍ച്ചയും തിരിച്ചടിയും, കേരള ടൂറിസത്തിനും കൊച്ചി തുറമുഖത്തിനും കോടികളുടെ വരുമാന നഷ്ടമാണുണ്ടാക്കിയത്. എന്നാല്‍ ക്രൂയിസ് ടൂറിസം മേഖല ഉയിര്‍പ്പിലായിരുന്നു. എന്നാല്‍ യുദ്ധഭീതി മറ്റൊരു പ്രഹരമായി. ഇതില്‍ നിന്നുള്ള ഉയിര്‍പ്പ് എന്നായിരിക്കുമെന്ന ആശങ്കയിലാണ് ടൂറിസം ഏജന്‍സികള്‍. ക്രൂയിസ് ടൂറിസം മേഖലയില്‍മാത്രം പ്രതിവര്‍ഷം കൊച്ചി തുറമുഖത്തിന് 15- 20 കോടി രൂപയാണ് വരുമാന നഷ്ടമുണ്ടായത്. കൂടാതെ സംസ്ഥാന ടൂറിസം രംഗത്തെ വിവിധ മേഖലകളിലും കോടികള്‍ നഷ്ടമുണ്ടായതായാണ് ബന്ധപ്പെട്ടവര്‍ പറയുന്നത്.

പ്രതിവര്‍ഷം സീസണില്‍ ശരാശരി 45 ഓളം ആഡംബര വിദേശ വിനോദ സഞ്ചാര കപ്പലുകളാണ് കൊച്ചി തുറമുഖത്ത് എത്താറുള്ളത്. ചെറുതും വലുതുമായ കപ്പലുകള്‍ തുറമുഖത്ത് എത്തിയാല്‍ വാര്‍ഫേജ് നിരക്കടക്കം 40- 60 ലക്ഷം രൂപ വരെയാണ് തുറമുഖത്തിന് ലഭിക്കുക. കൂടാതെ ക്ലിയറിങ്, കുടിവെള്ളം, ചികിത്സ പരിശോധന, മാലിന്യനീക്കം തുടങ്ങി മറ്റിനങ്ങളിലും വരുമാനമുണ്ട്. 600 മുതല്‍ 2800 യാത്രക്കാരും 1200ല്‍ ഏറെ കപ്പല്‍ ജീവനക്കാരുമാണ് കപ്പലുകളിലെത്തുക. ഒരു സീസണില്‍ അരലക്ഷത്തിലെറെ ക്രൂയിസ് സഞ്ചാരികളെത്തും. ഒരു വിനോദസഞ്ചാരി ശരാശരി 800- 1100 ഡോളര്‍ വരെ (8000- 10000 രൂപ) ചെലവഴിക്കപ്പെടുമെന്നാണ് കണക്ക്. ഇതിലൂടെ പ്രതിവര്‍ഷം 30- 40 കോടി രൂപയാണ് പ്രാദേശിക വരുമാന നഷ്ടം കണക്കാക്കുന്നത്. കൂടാതെ വാഹനയാത്രാ ചെലവിലുള്ള വരുമാന നഷ്ടം വേറെയും.

ആഡംബര കപ്പലുകള്‍ക്കും സഞ്ചാരികള്‍ക്കും മികച്ച സേവനവും ആധുനിക സൗകര്യവുമായി പുതിയ ക്രൂയിസ് ടെര്‍മിനലും കൊച്ചി തുറമുഖ അതോറിറ്റി സജ്ജീകരിച്ച് തുറക്കുകയും ചെയ്തരുന്നു. നിരക്ക് ഇളവുകളും നല്കിയിട്ടുണ്ട്. മുംബൈ- കൊച്ചി- ലക്ഷദ്വീപ് ഗോവ ടൂറിസം കേന്ദ്രങ്ങളെ ബന്ധിപ്പിച്ച് ആഭ്യന്തര ടൂറിസം കപ്പലുകളും കൊച്ചി തുറമുഖം കേന്ദ്രീകരിച്ച് സര്‍വീസ് നടത്തുന്നുണ്ട്.