വയനാട്: കള്ളാടിയിലുണ്ടായ മണ്ണിടിച്ചില് ദുരന്തത്തില് മൂന്ന് പേര് മരിച്ചതായാണ് ഔദ്യോഗിക സ്ഥിരീകരണം. അഞ്ച് പേരെ കാണാതായി. ബുധനാഴ്ചയും രക്ഷാപ്രവര്ത്തനം നടത്തും. മന്ത്രിമാരായ ടി സിദ്ദിഖും അനില് കുമാറുമാണ് ദുരന്ത സ്ഥലം സന്ദര്ശിച്ച ശേഷം ഇക്കാര്യം വാര്ത്താസമ്മേളനത്തില് അറിയിച്ചത്.
മധ്യപ്രദേശ് സ്വദേശിയായ ചന്ദ്രഭാന്, ബിഹാര് സ്വദേശിയായ വികാസ് കുമാര്, ജാര്ഖണ്ഡ് സ്വദേശിയായ അന്മോള് എന്നിവരാണ് മരിച്ചവരില് മൂന്നുപേര്. വിക്രം, രാഹുല്, മുഹമ്മദ് ഇമ്രാന്, രാകേഷ്, അസറുദ്ദീന് അന്സാരി എന്നിവരെ കാണാതായി. കാലാവസ്ഥ പ്രതികൂലമാകുന്നത് വരെ രാത്രിയില് രക്ഷാപ്രവര്ത്തനം തുടരുമെന്നും മന്ത്രി അനില്കുമാര് പറഞ്ഞു.
റോഡ് ഗതാഗത യോഗ്യമാക്കാന് ഉള്ള പണികള് ഉടന് ആരംഭിക്കുമെന്ന് മന്ത്രി ടി. സിദ്ദീഖ് പറഞ്ഞു. ശാസ്ത്രീയ പരിശോധന നടത്തും, അതിനായി നാല് സോണുകള് ആക്കി തിരിക്കും. മരണപ്പെട്ടവരുടെ പോസ്റ്റ്മോര്ട്ടം പൂര്ത്തിയാക്കി.നാട്ടിലേക്ക് കൊണ്ടുപോകാനുള്ള നടപടികള് ഉടന് ഉണ്ടാവും. 2 പേര് ഐസിയുവില് ചികിത്സയിലാണ്. അതില് ദിലീപിന്റെ നില ഗുരുതരമാണ്. ബുധനാഴ്ച പൂര്ണ പരിശോധന നടത്താന് വേണ്ടി മണ്ണിടിച്ചില് സ്ഥലത്തേക്ക് പ്രവേശനം നിരോധനം ഉണ്ടാവുമെന്നും മന്ത്രി പറഞ്ഞു.
