ഫിലാഡെല്ഫിയ: ലോകകപ്പ് ഫുട്ബോള് മത്സരങ്ങള്ക്കൊടുവില് നല്കുന്ന സ്വര്ണ പാദുകത്തിനായുള്ള പോരാട്ടം ഫ്രഞ്ച് താരം കിലിയന് എംബാപ്പെ കടുപ്പിച്ചു. പരാഗ്വെയ്ക്കെതിരായ മത്സരത്തില് നേടിയ വിജയഗോളിലൂടെ എംബാപ്പെയുടെ, ഈ ലോകകപ്പിലെ ഗോള് നേട്ടം ഏഴായി ഉയര്ന്നു.
റൗണ്ട് ഓഫ് 32 പോരാട്ടത്തില് കേപ്പ് വെര്ദെയ്ക്കെതിരെ ഗോളടിച്ച മെസിയും ഈ ലോകകപ്പില് എത്തിനില്ക്കുന്നത് ഏഴ് വ്യക്തിഗത ഗോളുകളില്. ഗ്രൂപ്പ് ഘട്ടത്തില് ആദ്യ രണ്ട് കളികളിലും എംബാപ്പെ ഇരട്ട ഗോള് നേടിയിരുന്നു. സെനഗലിനെതിരെയും ഇറാഖിനെതിരെയും. റൗണ്ട് ഓഫ് 32 പോരാട്ടത്തില് കരുത്തന് സ്വീഡനെ 3-0ന് മുക്കിയ മത്സരത്തിലും എംബാപ്പെ ഇരട്ട ഗോള് നേടിയിരുന്നു. ഇതിലൂടെ ഒരു ലോകകപ്പില് മൂന്ന് തവണ ഇരട്ട ഗോള് നേടുകയെന്ന അപൂര്വ്വ നേട്ടത്തിനും എംബാപ്പെ ഉടമയായി.
ആറ് ഗോളുകളുടെ മികവുമായാണ് പ്രീക്വാര്ട്ടറില് പരാഗ്വെയ്ക്കെതിരെ എംബാപ്പെ ഇറങ്ങിയത്. പരാഗ്വെ തീര്ത്ത കടുത്ത പ്രതിരോധം ഫ്രഞ്ച് ടീമിനൊപ്പം എംബാപ്പെയുടെ ഗോള് നേട്ടത്തെയും ഒരു പരിധിവരെ തടഞ്ഞുനിര്ത്തി. മത്സരത്തിന് 70-ാം മിനിറ്റില് ലഭിച്ച പെനാല്റ്റി എംബാപ്പെ പിഴവില്ലാതെ വലയിലെത്തിച്ച് മെസിക്കൊപ്പമെത്തുകയായിരുന്നു. മെസി ഇതുവരെ കളിച്ച എല്ലാ മത്സരങ്ങളിലും ഗോള് നേടി. ഈ ലോകകപ്പില് ഇതുവരെ കളിച്ച എല്ലാ കളിയിലും ഗോള് നേടി ഏകതാരം മെസിയാണ്. ലോകകപ്പ് ചരിത്രത്തില് ഏറ്റവും കൂടുതല് ഗോള് നേടിയ താരങ്ങളുടെ പട്ടികയില് മെസിയാണ് മുന്നില്, 20 ഗോളുകള്. ഇത്രയും ഗോളുകള് നേടാന് മെസിക്ക് 30 മത്സരങ്ങള് വേണ്ടിവന്നു. തൊട്ടുപിന്നില് എംബാപ്പെയാണ്, 19 ഗോളുകള്. എംബാപ്പെയ്ക്ക് ഈ നേട്ടം കൈവരിക്കാന് വേണ്ടിവന്നത് കേവലം 19 മത്സരങ്ങളാണ്.
