തിരുവനന്തപുരം: ആര്യനാട് പൊലീസ് സ്റ്റേഷനിലും താലൂക്ക് ആശുപത്രിയിലും ഭീകരാന്തരീക്ഷം സൃഷ്ടിച്ച യുവാവിനെ പൊലീസ് കീഴ്‌പ്പെടുത്തി.ഇയാളുടെ ആക്രമണത്തില്‍ ആര്യനാട് സ്റ്റേഷന്‍ ഇന്‍സ്‌പെക്ടര്‍ സി. ദേവരാജന് തലയ്‌ക്ക് പരിക്കേറ്റു.
ഉഴമലയ്‌ക്കല്‍ കുളപ്പട വാലൂക്കോണം മങ്ങാട്ടുപാറ ‘യദു ഭവനില്‍’ യദു (23)വിനെയാണ് പൊലീസ് കസ്റ്റഡിയിലെടുത്തത്.കഴിഞ്ഞ രാത്രി 10.30 ഓടെയായിരുന്നു സംഭവം ഉണ്ടായത്.പകല്‍ സമയം,ആര്യനാട് – നെടുമങ്ങാട് റോഡില്‍ പാറയക്കാറ ഭാഗത്തുള്ള ഹോട്ടലില്‍ കയറി ഭക്ഷണം ഓര്‍ഡര്‍ ചെയ്ത യദു കാരണമില്ലാതെ അവിടെ അതിക്രമം കാട്ടി ഹോട്ടല്‍ ഉടമയെ മര്‍ദിച്ചു. സ്ഥലത്തെത്തിയ പൊലീസ് ഇയാളെ കസ്റ്റഡിയിലെടുത്ത് സ്റ്റേഷനിലെത്തിച്ചു.
എന്നാല്‍ യുവാവിന് മാനസികാസ്വാസ്ഥ്യമുണ്ടെന്ന് രക്ഷകര്‍ത്താക്കള്‍ അറിയിച്ചത് പ്രകാരം ഹോട്ടലുടമ പരാതിയില്ലെന്ന് എഴുതി നല്‍കി. തുടര്‍ന്ന് ആശുപത്രിയില്‍ ചികിത്സയ്‌ക്കായി മാതാപിതാക്കള്‍ക്കൊപ്പം ഇയാളെ വിട്ടയച്ചു. ഇവിടെനിന്നു കടന്നുകളഞ്ഞ യുവാവ് രാത്രി പത്തരയോടെ കൈയില്‍ മദ്യക്കുപ്പിയും ട്യൂബ്ലൈറ്റുമായി ആര്യനാട് സ്റ്റേഷനില്‍ കയറി ആക്രമണം നടത്തുക ആയിരുന്നു.
ഇതിന് ശേഷം സ്‌റ്റേഷനില്‍നിന്ന് യുവാവ് തൊട്ടടുത്തുള്ള ആര്യനാട് ഗവണ്‍മെന്റ് ആശുപത്രിയിലേക്ക് ഓടിക്കയറി. സ്ഥലത്തെത്തിയ എസ്എച്ച് ഒ.സി. ദേവരാജന് ഇയാളെ കീഴ്‌പ്പെടുത്താന്‍ ശ്രമിക്കുന്നതിനിടെ ഡോക്ടറുടെ മുറിക്ക് പുറത്ത് രോഗികള്‍ക്ക് ഇരിക്കാന്‍ ഇട്ടിരുന്ന ഇരുമ്പ് കസേരയെടുത്ത് ഇയാള്‍ ഇന്‍സ്‌പെക്ടറുടെ തലയ്‌ക്കടിച്ചു.തലയ്‌ക്കും നെറ്റിക്കും ഗുരുതര പരിക്കേറ്റ ഇന്‍സ്‌പെക്ടര്‍ക്ക് ആര്യനാട് ആശുപത്രിയില്‍ പ്രാഥമിക ചികിത്സ നല്‍കി. തുടര്‍ന്ന് വിദഗ്‌ദ്ധ ചികിത്സയ്‌ക്കായി സ്വകാര്യ ആശുപത്രിയിലേക്ക് മാറ്റി.
ആശുപത്രിയില്‍ വച്ച് വീണ്ടും അക്രമം കാട്ടിയ യദുവിനെ പാറാവ് പൊലീസുകാര്‍ സാഹസികമായാണ് കീഴ്‌പ്പെടുത്തിയത്.
