കൊച്ചി : താരസംഘടന അമ്മയുടെ അഡ്‌ഹോക്ക് കമ്മിറ്റിയുടെ പ്രവര്‍ത്തനങ്ങള്‍ക്ക് താല്‍ക്കാലിക വിലക്ക് ഏര്‍പ്പെടുത്തി എറണാകുളം മുന്‍സിഫ് കോടതി. ശ്വേത മേനോന്റെ ഹര്‍ജിയില്‍ ആണ് ഉത്തരവ്. വെളളിയാഴ്ച ഉച്ചയ്‌ക്ക് ശേഷമാണ് ശ്വേത കോടതിയെ സമീപിച്ചത്.
അമ്മയുടെ പ്രവര്‍ത്തങ്ങള്‍ അഡ്‌ഹോക്ക് കമ്മറ്റിക്ക് നടത്താന്‍ അധികാരം ഇല്ലെന്നാണ് ശ്വേത വാദമുയര്‍ത്തിയത്. നിലവില്‍ ശ്വേതയുടെ നേതൃത്വത്തിലുള്ള കമ്മിറ്റിയുടെ പ്രവര്‍ത്തനം തുടരാമെന്നും കോടതിയുടെ ഉത്തരവില്‍ ഉണ്ട്.
അമ്മ സംഘടനയുടെ ജൂണ്‍ 21 ന് നടന്ന വാര്‍ഷിക പൊതുയോഗത്തിന് പിന്നാലെ ശ്വേത മേനോന്‍ പ്രസിഡന്റ് ആയ ഭരണസമിതി ഒന്നടങ്കം രാജി പ്രഖ്യാപിച്ചിരുന്നു.പിന്നാലെ രമേഷ് പിഷാരടി അധ്യക്ഷനായ അഡ്‌ഹോക്ക് കമ്മിറ്റി നിലവില്‍ വന്നു.കഴിഞ്ഞ ദിവസം കൊച്ചിയില്‍ അഡ്‌ഹോക്ക് കമ്മിറ്റി യോഗത്തിന് ശേഷം, രാജി പ്രഖ്യാപിച്ച ശ്വേത മേനോന്‍ അടക്കം അമ്മയ്‌ക്ക് ഔദ്യോഗികമായി രാജിക്കത്ത് നല്‍കിയിട്ടില്ലെന്ന് രമേഷ് പിഷാരടിയും അഡ്‌ഹോക്ക് കമ്മിറ്റി അംഗം കെ ബി ഗണേഷ് കുമാറും കുറ്റപ്പെടുത്തിയിരുന്നു. തുടര്‍ന്ന് അമ്മയുടെ ബൈലോ പ്രകാരം രാജി വച്ച കമ്മിറ്റിക്കാണ് അടുത്ത തിരഞ്ഞെടുപ്പ് നടക്കുന്നതുവരെ സംഘടനയുടെ ഭരണ ചുമതലയെന്നും അഡ്‌ഹോക്ക് കമ്മിറ്റിക്ക് സാധുതയില്ലെന്നും ശ്വേത മേനോന്‍ ഫേസ്ബുക്ക് കുറിപ്പിട്ടു. ഇതിന് പിന്നാലെയാണ് ഇക്കാര്യം ചൂണ്ടിക്കാട്ടി കോടതിയെ സമീപിച്ചത്.
