തിരുവനന്തപുരം: വീര്യം കുറഞ്ഞ മദ്യത്തിലെ സാമ്പത്തിക നേട്ടം വ്യക്തമാക്കണമെന്നും എല്ഡിഎഫിന് എന്തെങ്കിലും നഷ്ടമുണ്ടായെങ്കില് ഇന്ഡി മുന്നണിയിലെ ഘടകകക്ഷി എന്ന നിലയില് നഷ്ടപരിഹാരം നല്കണമെന്നും ബിജെപി നിയമസഭാ കക്ഷിനേതാവ് ബി.ബി. ഗോപകുമാര്. ഇന്ഡി മുന്നണിലെ സഖ്യകക്ഷിക്ക് സാമ്പത്തിക കാര്യത്തില് എന്തെങ്കിലും കുറവ് സംഭവിച്ചിട്ടുണ്ടെങ്കില് അടിയന്തരമായി ആ കുറവ് നികത്തണം. എല്ഡിഎഫിന്റെ ഭരണകാലത്തെ രൂപയുടെ മൂല്യം കണക്കാക്കി അവര്ക്ക് നഷ്ടപരിഹാരം കൊടുക്കണമെന്നും ഗോപകുമാര് പരിഹസിച്ചു. ധനകാര്യ ബില്ലിനെ എതിര്ത്ത് സംസാരിക്കുകയായിരുന്നു അദ്ദേഹം.
മാറാട് കലാപവുമായി ബന്ധപ്പെട്ട് അന്ന് കൊടുത്ത പോലീസ് റിപ്പോര്ട്ടിലും ആ കലാപത്തിന് പിന്നില് വിദേശ ഫണ്ടിങ് നടത്തിയിട്ടുണ്ടെന്ന് വ്യക്തമായതാണ്. രാജ്യസുരക്ഷയ്ക്കുവേണ്ടി കേന്ദ്രസര്ക്കാര് എഫ്ആര്സിഎ ബില്ല് കൊണ്ടുവരുമ്പോള് അതിനെ എതിര്ക്കുകയാണ്. അന്താരാഷ്ട്ര തീവ്രവാദിയായ മദനിയെ അനുകൂലിച്ച് പ്രമേയം പാസാക്കിയ നിയമസഭയാണ് രാജ്യസുരക്ഷയ്ക്കായുള്ള ഒരു ബില്ലിനെ എതിര്ക്കുന്നതെന്ന് പ്രമേയം ഉദ്ധരിച്ച് പറഞ്ഞു.
ധനകാര്യമന്ത്രി ഇവിടെ അവതരിപ്പിച്ച ധനബില് നിയമസഭയ്ക്കുള്ള അവകാശങ്ങളെ കാറ്റില്പ്പറത്തുന്നതാണെന്ന് വാര്ത്താസമ്മേളനത്തില് വി. മുരളീധരന് എംഎല്എ പറഞ്ഞു. നിയമസഭയിലോ പാര്ലമെന്റിലോ നിയമം അവതരിപ്പിച്ച ശേഷം സര്ക്കാര് തീരുമാനം എടുക്കും എന്ന് പറയുമ്പോള് അതിന്റെ അര്ത്ഥം സര്ക്കാരാണ് സുപ്രീം എന്നാണ്. നമ്മുടെ ഭരണഘടനയില് നിയമസഭയും പാര്ലമെന്റുമാണ് സുപ്രീം. ആ അടിസ്ഥാനതത്വത്തെ തള്ളിക്കളഞ്ഞാണ് ബില് നിയമസഭയില് എത്തിച്ചശേഷം എന്ന് നടപ്പിലാക്കും എന്നുള്ള കാര്യം പിന്നീട് ഓര്ഡറിലൂടെ തീരുമാനിക്കും എന്ന് പറയുന്നതെന്നും അദ്ദേഹം പറഞ്ഞു.
