എംബാപ്പെയെ തടയാന്‍ ആരുണ്ട്?; ഫ്രാന്‍സും മെക്‌സിക്കോയും നോര്‍വെയും പ്രീ ക്വാര്‍ട്ടറില്‍

ഫിലാഡല്‍ഫിയ: തുടര്‍ച്ചയായ നാലാം മത്സരത്തിലും തകര്‍പ്പന്‍ ജയം കുറിച്ച് ഫ്രഞ്ച് പടയോട്ടം. റൗണ്ട് ഓഫ് 32ല്‍ ഫ്രാന്‍സ് സ്വീഡനെ 3-0ന് പരാജയപ്പെടുത്തിയപ്പോള്‍ രണ്ടുഗോളുകളും പിറന്നത് കിലിയന്‍ എംബാപ്പെയുടെ ബൂട്ടില്‍നിന്ന്. 5, 74 മിനിറ്റുകളിലായിരുന്നു എംബാപ്പെയുടെ ഗോളുകള്‍. ലോകകപ്പ് നോക്കൗട്ട് റൗണ്ടുകളില്‍ ഏറ്റവും കൂടുതല്‍ ഗോള്‍ (9) നേടുന്ന താരമായി ഇതോടെ എംബാപ്പെ മാറി.

എട്ടുഗോളുകള്‍ നേടിയ മുന്‍ ബ്രസീലിയന്‍ താരങ്ങളായ റൊണാള്‍ഡോ, ലിയോനിഡാസ് എന്നിവരെയാണ് മറികടന്നത്. ഈ ലോകകപ്പില്‍ ഗോള്‍വേട്ടക്കാരുടെ പട്ടികയില്‍ മെസ്സിക്കൊപ്പമെത്താനും എംബാപ്പെക്കായി. ഇരുവരും ആറു ഗോളുകള്‍ വീതമാണ് ഇതുവരെ അടിച്ചത്. ലോകകപ്പില്‍ ഏറ്റവും കൂടുതല്‍ ഗോള്‍ നേടിയ മെസിയുടെ റിക്കാര്‍ഡ് (19 ഗോളുകള്‍) തകര്‍ക്കാന്‍ എംബാപ്പെയ്‌ക്ക് ഒരു ഗോള്‍ കൂടി മതി. 53-ാം മിനിറ്റില്‍ ബാര്‍കോളയും ലക്ഷ്യം കണ്ടതോടെ ഫ്രാന്‍സിന്റെ വിജയം പൂര്‍ത്തിയായി. പരാഗ്വെയാണ് പ്രീ ക്വാര്‍ട്ടറില്‍ ഫ്രാന്‍സിന്റെ എതിരാളികള്‍.

മെക്‌സിക്കോ സ്വന്തം തട്ടകത്തില്‍ ഇക്വഡോറിനെ 2-0ന് പരാജയപ്പെടുത്തി പ്രീ ക്വാര്‍ട്ടറില്‍. 22-ാം മിനിറ്റില്‍ ജൂലിയന്‍ ക്വിനോനെസും 31-ാം മിനിറ്റില്‍ റൗള്‍ ജിമെനെസുമാണ് മെക്സിക്കോയുടെ വിജയഗോളുകള്‍ നേടിയത്. ഇംഗ്ലണ്ട്-കോംഗോ മത്സര വിജയികളാണ് പ്രീ ക്വാര്‍ട്ടറില്‍ മെക്സിക്കോയുടെ എതിരാളികള്‍.

മറ്റൊരു മത്സരത്തില്‍ നോര്‍വെ 2-1ന് ഐവറി കോസ്റ്റിനെ പരാജയപ്പെടുത്തി. 39-ാം മിനിറ്റില്‍ അന്റോണിയോ നുസയിലൂടെ നോര്‍വേ മുന്നിലെത്തിയെങ്കിലും 74-ാം മിനിറ്റില്‍ അമദ് ഡിയാലോയിലൂടെ ഐവറികോസ്റ്റ് സമനില പിടിച്ചു. 86-ാം മിനിറ്റില്‍ സൂപ്പര്‍ താരം ഹാലന്‍ഡ് നോര്‍വെയുടെ വിജയഗോള്‍ നേടി. പ്രീ ക്വാര്‍ട്ടറില്‍ ബ്രസീലാണ് നോര്‍വെയുടെ എതിരാളികള്‍.

ലോകകപ്പില്‍ ഇന്ന്
സ്‌പെയിന്‍- ഓസ്ട്രിയ (രാത്രി 12.30)

നാളെ: പോര്‍ച്ചുഗല്‍- ക്രൊയേഷ്യ (പുലര്‍ച്ചെ 4.30)
സ്വിറ്റ്‌സര്‍ലന്‍ഡ്- അള്‍ജീരിയ (രാവിലെ 8.30)