കൊച്ചി: നടന് ടിനി ടോമിനെതിരെ നടി അന്സിബ ഹസ്സന് നല്കിയ ക്രിമിനല് കേസില് അമ്മ പ്രസിഡന്റായിരുന്ന ശ്വേതാ മേനോന്റെ മൊഴിയെടുക്കാന് പൊലീസ്. കലൂരിലെ അമ്മ ഓഫീസില് വെച്ച് അന്സിബ ഹസ്സനെതിരെ ടിനി ടോം ‘ജിഹാദി’ പരാമര്ശം നടത്തിയതായി സാക്ഷികളില് ഒരാളായ നീന കുറുപ്പ് പോലീസിനോട് പറഞ്ഞതായും ടിനി സമാനമായ പരാമര്ശങ്ങള് നടത്തുന്നത് ശ്വേത മേനോനും കേട്ടിട്ടുണ്ടെന്നും നീന കുറുപ്പ് അവകാശപ്പെട്ടിരുന്നു. എന്നാല് ഇതു സംബന്ധിച്ച് ശ്വേത മേനോനെ ചോദ്യം ചെയ്തോ അവര് നിഷേധിച്ചോ എന്നീ കാര്യങ്ങള് വ്യക്തമാക്കുന്നതില് പോലീസ് പരാജയപ്പെട്ടുവെന്നായിരുന്നു കേസ് പരിഗണിച്ച എറണാകുളം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കാവ്യ സോമന് വിലയിരുത്തിയത്. ശ്വേതയുടെ മൊഴി അന്വേഷണത്തില് പ്രധാനമായിരുന്നെന്ന് കോടതി സൂചിപ്പിക്കുകയും ചെയ്തു. ഈ സാഹചര്യത്തിലാണ് മൊഴിയെടുപ്പ്.
അമ്മ ഓഫീസില് സംസാരിക്കവെ, ടിനി ടോം തന്നെ ‘ജിഹാദി’ എന്ന് പരാമര്ശിക്കുകയും തന്റെ ഡിഎന്എയില് ഒരു ‘പ്രശ്നം’ ഉണ്ടെന്ന് പറയുകയും ചെയ്തതായി അന്സിബ ആരോപിച്ചിരുന്നു. ടിനി ടോമിന്റെ
പരാമര്ശങ്ങളില് ‘ ക്രിമിനല് ഉദ്ദേശ്യമുണ്ടോ ഇല്ലയോ എന്ന് മുഴുവന് തെളിവുകളും ശേഖരിച്ചശേഷം മാത്രമേ നിര്ണ്ണയിക്കാന് കഴിയൂ. പ്രഥമദൃഷ്ട്യാ, പരാതിക്കാരനെതിരെ കുറ്റകൃത്യത്തിന്റെ ഒരു ഘടകമുണ്ട്, അതില് അന്വേഷണം ആവശ്യമാണെന്നാണ് ‘ കോടതി അഭിപ്രായപ്പെട്ടത്.
കളിയായ രീതിയിലാണ് പരാമര്ശങ്ങള് നടത്തിയതെന്ന് പോലീസ് വിലയിരുത്തിയെങ്കിലും, വിശദമായ അന്വേഷണം കൂടാതെ അത്തരമൊരു നിഗമനത്തിലെത്താന് കഴിയില്ലെന്ന് മജിസ്ട്രേറ്റ് പറഞ്ഞു.
അന്സിബ ഹസനെ പ്രതിനിധീകരിച്ച് അഭിഭാഷകരായ മുഹമ്മദ് ഫിര്ദൗസ് , ലിബിന് വര്ഗീസ് എന്നിവര് ഹാജരായി.
