ന്യൂയോര്‍ക്ക്: യൂറോപ്യന്‍ ഫുട്ബോളിന്റെ പാരമ്പര്യം കാത്തുസൂക്ഷിച്ച ഫ്രാന്‍സ് സ്വീഡന്റെ പോരാട്ടവീര്യത്തെ തകര്‍ത്തു.മെറ്റ് ലൈഫ് സ്റ്റേഡിയത്തില്‍ നടന്ന നോക്കൗട്ട് റൗണ്ടില്‍ എംബാപ്പെയുടെ മികവില്‍ മൂന്ന് ഗോളുകള്‍ക്കാണ് സ്വീഡനെ തോല്‍പിച്ചത്.
വേഗതയും സാങ്കേതിക മികവും കൊണ്ട് ശരിയ്‌ക്കും എതിരാളികളായ സ്വീഡനെ വിറപ്പിക്കുകയായിരുന്നു ഫ്രാന്‍സ്. അച്ചടക്കവും കരുത്തും കൈമുതലാക്കി, 2026ലെ ലോകകപ്പില്‍ കഴിഞ്ഞ മൂന്ന് മത്സരങ്ങളിലും തോല്‍ക്കാതെ മുന്നേറിയ സ്വീഡന് പക്ഷെ ബുധനാഴ്ച അടിപതറി.
എംബാപ്പെ അടിച്ച രണ്ട് ഗോളുകളുടെ മികവിലാണ് സ്വീഡന് തകര്‍ന്നത്. 45ാം മിനിറ്റിലാണ് എംബാപ്പെ സ്വീഡന്റെ വല കുലുക്കിയത്. പിന്നാലെ 53ാം മിനിറ്റില്‍ ബ്രാഡ്ലി ബാര്‍കോള ഫ്രാന്‍സിന് വേണ്ടി രണ്ടാമത്തെ ഗോള്‍ നേടി. പിന്നീട് 74ാം മിനിറ്റില്‍ കിലിയന്‍ എംബാപ്പെ വീണ്ടും ഒരു ഗോള്‍ കൂടി നേടിയതോടെ സ്വീഡന് പിന്നെ തലപ്പൊക്കാനായില്ല.
ഉടനീളം ഫ്രാന്‍സിന്റെ ആധിപത്യമായിരുന്നു. ഫ്രാന്‍സിന് വേണ്ടി സ്വന്തം. ഡിഫന്‍സീവ് മിഡ്ഫീല്‍ഡര്‍മാരായി ഔറേലിയന്‍ ചൗമെനിയും കോനെയും മധ്യനിരയില്‍ തിളങ്ങിയപ്പോള്‍ ഡെംബലെ വലതുവിങ്ങിലും ഡിസയര്‍ ഡൗ ഇടതുവിങ്ങിലും മുന്നേറ്റത്തിന്റെ കുന്തമുനകളായി. സെന്‍ട്രല്‍ മിഡ്ഫീല്‍ഡറായി ഒലിസെയും ആക്രമണങ്ങള്‍ക്ക് ചുക്കാന്‍ പിടിക്കാനുണ്ടായിരുന്നു. ഇതിനൊപ്പം എംബാപ്പെയുടെയും ഡെബലെയുടെയും വേഗവും ഡ്രിബ്ലിങ് മികവും ഫ്രാന്‍സിനെ ഏറെ അപകടകാരികളാക്കി എന്ന് വേണം കരുതാന്‍. .
ഗ്രൂപ്പ് ഐയില്‍ നിന്ന് മൂന്ന് മത്സരങ്ങളും വിജയിച്ചാണ് ഫ്രാന്‍സ് നോക്കൗട്ട് 32-ല്‍ എത്തിയത്. ഗ്രൂപ്പിലെ ആദ്യകളിയില്‍ സെനഗലിനെ 3-1നും രണ്ടാം കളിയില്‍ ഇറാഖിനെ 3-0നും അവസാന കളിയില്‍ നോര്‍വേയെ 4-1നും പരാജയപ്പെടുത്തി 9 പോയിന്റുമായാണ് ഫ്രാന്‍സ് ഗ്രൂപ്പ് ചാമ്പ്യന്മാരായി ഫ്രാന്‍സ് നോക്കൗട്ട് റൗണ്ടിലെത്തിയത്.
എംബാപ്പെയും ഡെംബലെയും
ഗ്രൂപ്പ് ഘട്ടത്തില്‍ ഫ്രാന്‍സ് നേടിയ 10 ഗോളില്‍ എട്ടെണ്ണവും അടിച്ചത് സൂപ്പര്‍ സ്‌ട്രൈക്കറും നായകനുമായ കിലിയന്‍ എംബാപ്പെയും മറ്റൊരു സൂപ്പര്‍താരമായ ഡെംബലെയും ചേര്‍ന്നാണ്. രണ്ടുപേരും നാല് ഗോളുകള്‍ വീതമാണ് നേടിയത്. നോര്‍വേക്കെതിരായ കളിയില്‍ ഡെംബലെ ഹാട്രിക്കും നേടി. ഇവര്‍ക്ക് പുറമെ ഡിസയര്‍ ഡൗ, മൈക്കല്‍ ഒലിസും മികച്ച താരങ്ങളാണ്. 4-2-3-1 ശൈലിയില്‍ എംബാപ്പെയെ സ്‌ട്രൈക്കറായാണ് ഫ്രാന്‍സ് ഇറങ്ങിയത്.
