ഗാന്ധിനഗര്‍: നിയമവിരുദ്ധമായി പശുക്കളെ കശാപ്പുചെയ്യുകയും ബീഫ് കടത്തുകയും ചെയ്ത പ്രതിക്ക് ഗുജറാത്ത് ഹൈക്കോടതി ജാമ്യം നിഷേധിച്ചു. ജനുവരിയില്‍ അറസ്റ്റിലായ മുഹമ്മദ് ആരിഫ് അബ്ദുള്‍ റാസല്‍ സമോളിന്റെ ജാമ്യാപേക്ഷയാണ് ജസ്റ്റിസ് ഹസ്മുഖ് ഡി സുതാര്‍ തള്ളിയത്. സമാനമായ എട്ട് ക്രിമിനല്‍ കേസുകള്‍ നിലനില്‍ക്കെ, അതേ കുറ്റകൃത്യം തുടര്‍ന്നുവെന്ന് കോടതി ചൂണ്ടിക്കാട്ടി.
‘ഹിന്ദു, ജൈന സമുദായങ്ങളില്‍പെട്ടവരുള്‍പ്പെടെ ഇന്ത്യന്‍ സമൂഹത്തിലെ ഒരു പ്രധാന വിഭാഗം പശുവിനെ പവിത്രമായും സംരക്ഷിക്കേണ്ടതാണെന്നും കരുതുന്നുവെന്ന വസ്തുത കോടതിക്ക് അവഗണിക്കാന്‍ കഴിയില്ല. ഇത്തരം കുറ്റകൃത്യങ്ങള്‍ പൊതുജനവികാരങ്ങളെ വ്രണപ്പെടുത്തുകയും പ്രദേശത്ത് സാമൂഹിക സംഘര്‍ഷം സൃഷ്ടിക്കുകയും ചെയ്യും’. കോടതി പറഞ്ഞു.
