കൊല്ലം: സോഷ്യല്‍ മീഡിയകള്‍ വഴി നടക്കുന്നത് ആഖ്യാന യുദ്ധങ്ങളാണെന്നും ഇതില്‍പെട്ടുപോകുന്ന ജെന്‍സികള്‍ ഒരേസമയം നമ്മുടെ രാജ്യത്തിന് ആസ്തിയും ബാധ്യതയുമാണെന്നും മഹാത്മാഗാന്ധി സര്‍വകലാശാല വൈസ്ചാന്‍സിലര്‍ പ്രൊഫ. ഡോ. ഡി. മാവൂത്ത്. കൊല്ലത്ത് ഭാരതീയ വിചാരകേന്ദ്രം സംസ്ഥാന പഠനശിബിരം ഉദ്ഘാടനം ചെയ്യുകയായിരുന്നു അദ്ദേഹം.
ആദ്യം സോഷ്യല്‍ മീഡിയകളിലും പിന്നീട് മുഖ്യധാരാ മാധ്യമങ്ങളിലും പ്രതിലോമകരമായ പ്രചാരണം ശക്തിപ്പെടുന്നു. നമ്മുടെ രാജ്യം 2047ല്‍ സ്വാതന്ത്ര്യത്തിന്റെ നൂറാം വര്‍ഷത്തിലെത്തും. അതിന് മുന്നോടിയായി വികസിതഭാരതം ലക്ഷ്യമിട്ട് രാജ്യം വന്‍മുന്നേറ്റം കാഴ്ചവയ്‌ക്കുകയാണ്.
ഇതിനെ തുരങ്കം വയ്‌ക്കാന്‍ അന്താരാഷ്‌ട്രതലത്തില്‍ തന്നെ വൈദേശിക ആഭ്യന്തരശത്രുക്കള്‍ കരുക്കള്‍ നീക്കുന്നു. ഇതെല്ലാം നമ്മുടെ ജെന്‍സികള്‍ മനസിലാക്കണം. അതിന് കുറച്ചു നേരമെങ്കിലും സോഷ്യല്‍ മീഡിയയില്‍ നിന്ന് മുക്തരാകണം. നിക്ഷിപ്ത താത്പര്യമുള്ള ഡീപ് സ്റ്റേറ്റിന്റെ ഏജന്റുമാര്‍ ജെന്‍സികളെ ഉപകരണങ്ങളാക്കാന്‍ സജീവമായി രംഗത്തുണ്ട്. അതിന്റെ ലക്ഷണങ്ങളാണ് പലയിടത്തും കണ്ടുവരുന്നത്. നമ്മുടെ ജെന്‍സിയാകട്ടെ ജെന്‍ആല്‍ഫയാകട്ടെ അത്തരക്കാരുടെ ഇരകളാകേണ്ടവരല്ല. രാഷ്‌ട്രപുരോഗതിക്കും മികച്ച ഭാവിക്കും സ്വന്തം വിഭവശേഷി ബോധ്യപ്പെട്ട് ജെന്‍സികള്‍ രാജ്യത്തിനൊപ്പം നി
ല്‍ക്കണം.
അതിന് പുതിയ തലമുറ രാജ്യത്തിന്റെ പാരമ്പര്യവും സംസ്‌കാരവും പോരാട്ടങ്ങളും പഠിക്കണം. ധാര്‍മികതയും രാഷ്‌ട്രസ്‌നേഹവും കഠിനാധ്വാനവുമാണ് അതിനുള്ള മാര്‍ഗം. ഭാരതീയ വിചാരകേന്ദ്രം പഠിപ്പിക്കുന്നതും അതാണെന്നും അദ്ദേഹം പറഞ്ഞു.
ഭാരതീയ വിചാരകേന്ദ്രം ഡയറക്ടര്‍ ആര്‍. സഞ്ജയന്‍ അധ്യക്ഷനായി. മുന്‍ രാജ്യസഭാംഗം പ്രൊഫ. രാകേഷ് സിന്‍ഹ, സംസ്ഥാന അധ്യക്ഷന്‍ ഡോ. സി.വി. ജയമണി, ഉപാധ്യക്ഷന്‍ കെ.സി. സുധീര്‍ബാബു, സംസ്ഥാന സെക്രട്ടറി ശ്രീധരന്‍ പുതുമന, ക്ലാസിക്കല്‍ മലയാളം മുന്‍ഡയറക്ടര്‍ പ്രൊഫ. ഡോ. വി.എസ്. രാധാകൃഷ്ണന്‍ തുടങ്ങിയവര്‍ സംസാരിച്ചു.
