കൊല്ലം: തിരുവിതാംകൂര് ദേവസ്വം ബോര്ഡിന്റെ അധീനതയിലുള്ള മാമൂട്ടില്ക്കടവ് വടമനക്കാവ് ക്ഷേത്രത്തിന്റെ പടിഞ്ഞാറെ നടയിലേക്കുള്ള ഭക്തരുടെ പ്രധാന സഞ്ചാരവഴിയില് അനധികൃതമായി ഇരുമ്പുതൂണുകള് സ്ഥാപിച്ച സംഭവം പ്രതിഷേധത്തിനും വിവാദങ്ങള്ക്കും വഴിവെച്ചു. ഹിന്ദു ഐക്യവേദിയുടെ ശക്തമായ ഇടപെടലിനെയും പ്രതിഷേധത്തേയും തുടര്ന്ന് ഇവിടെ സ്ഥാപിച്ചിരുന്ന തൂണുകള് കരാര് കമ്പനി നീക്കം ചെയ്തു.
കൊല്ലം കോര്പ്പറേഷന് മാലിന്യ സംസ്കരണ ഗ്യാസ് പ്ലാന്റ് പദ്ധതിക്കായി കരാര് നല്കിയ കമ്പനിയാണ് ക്ഷേത്രഭൂമിയില് തിരുവിതാംകൂര് ദേവസ്വം ബോര്ഡിന്റെ അനുമതിയില്ലാതെ നിര്മ്മാണ പ്രവര്ത്തനങ്ങള് ആരംഭിച്ചതെന്നാണ് ആരോപണം. ക്ഷേത്രത്തിലേക്ക് നിത്യവും എത്തുന്ന ഭക്തരുടെ സഞ്ചാരവഴി തടസ്സപ്പെടുത്തുന്ന രീതിയില് ഇരുമ്പുതൂണുകള് സ്ഥാപിച്ചിക്കുകയായിരുന്നു. സംഭവം ശ്രദ്ധയില്പ്പെട്ടതോടെ ഹിന്ദു ഐക്യവേദി സംസ്ഥാന സെക്രട്ടറി തെക്കടം സുദര്ശനന്, ജില്ലാ സെക്രട്ടറി ആര്.ടി. ശ്യാംകുമാര്, കോര്പ്പറേഷന് സമിതി പ്രസിഡന്റ് പ്രമോദ് പ്രഭു, ക്ഷേത്ര ഉപദേശക സമിതി സെക്രട്ടറി സന്തോഷ് എന്നിവര് സ്ഥലത്തെത്തി സ്ഥിതിഗതികള് വിലയിരുത്തി.
തുടര്ന്ന് തിരുവിതാംകൂര് ദേവസ്വം ബോര്ഡിലെയും കൊല്ലം കോര്പ്പറേഷനിലെയും ബന്ധപ്പെട്ട ഉന്നത ഉദ്യോഗസ്ഥരുമായി അടിയന്തരമായി ബന്ധപ്പെടുകയും ശക്തമായ പ്രതിഷേധം അറിയിക്കുകയും ചെയ്തു. കോര്പ്പറേഷനിലെ എഞ്ചിനീയറിംഗ് വിഭാഗം ഉദ്യോഗസ്ഥരുടെ നിര്ദ്ദേശപ്രകാരമാണ് നിര്മ്മാണം നടത്തിയതെന്ന് കരാര് കമ്പനി വിശദീകരിച്ചു. എന്നാല് ക്ഷേത്രഭൂമി സംബന്ധിച്ച രേഖകള് ഹാജരാക്കി തിരുവിതാംകൂര് ദേവസ്വം ബോര്ഡ് ഉദ്യോഗസ്ഥര്ക്ക് നേരിട്ട് പരാതി നല്കുകയായിരുന്നു.
പരാതി പരിശോധിച്ച സബ് ഗ്രൂപ്പ് ഓഫീസര് അനുമതിയില്ലാതെ സ്ഥാപിച്ച തൂണുകള് ഉടന് നീക്കം ചെയ്യാന് കരാര് കമ്പനിയോട് നിര്ദേശം നല്കി. ഇതിന്റെ അടിസ്ഥാനത്തില് സ്ഥാപിച്ചിരുന്ന ഇരുമ്പുതൂണുകള് പൊളിച്ചുമാറ്റി ഭക്തര്ക്കുള്ള സഞ്ചാര വഴി പൂര്വസ്ഥിതിയിലാക്കി. ക്ഷേത്രങ്ങളുടെ വഴി തടഞ്ഞാല് കോര്പ്പറേഷന് ഭരണത്തിന് പൂട്ടിടാന് ഹൈന്ദവ സമൂഹത്തിന് ശക്തിയുണ്ടെന്ന് ഹിന്ദു ഐക്യവേദി സംസ്ഥാന സെക്രട്ടറി തെക്കടം സുദര്ശനന് പറഞ്ഞു.
മാമൂട്ടില്ക്കടവ് വടമനക്കാവ് ക്ഷേത്രത്തിന്റെ പടിഞ്ഞാറെ നടയില് കമ്പിവേലി കെട്ടി ഭക്തരുടെ വഴി തടഞ്ഞത് ആരുടെ അനുമതിയോടെയാണെന്ന് കോര്പ്പറേഷന് ഭരണസമിതി വ്യക്തമാക്കണം. ക്ഷേത്രങ്ങളുടെ അവകാശങ്ങളും വിശ്വാസികളുടെ സഞ്ചാരസ്വാതന്ത്ര്യവും സംരക്ഷിക്കപ്പെടണം. ക്ഷേത്രങ്ങളുടെ വഴി തടയാന് കോര്പ്പറേഷന് ഭരണസമിതി തുനിഞ്ഞിറങ്ങിയാല് കോര്പ്പറേഷന് ഭരണത്തിന് പൂട്ടിടാന് ഹൈന്ദവ സമൂഹത്തിന് ശക്തിയുണ്ടെന്ന കാര്യം ആരും മറക്കരുതെന്നും ഇത്തരത്തിലുള്ള നടപടികള് ഇനിയും ആവര്ത്തിച്ചാല് ശക്തമായ ജനകീയ പ്രതിഷേധം സംഘടിപ്പിക്കുമെന്നും അദ്ദേഹം പറഞ്ഞു.
