കൊച്ചി: മുന് മുഖ്യമന്ത്രി പിണറായി വിജയന്റെ മകള് വീണയുടെ വീടു പരിശോധിച്ച എന്ഫോഴ്സ്മെന്റ് ഡയറക്ടറേറ്റ് ഉദ്യോഗസ്ഥര്ക്കു നേരേയുണ്ടായ ആക്രമണം മുന്കൂട്ടിയുള്ള ആസൂത്രണമാണെന്ന് ഇ ഡി ഹൈക്കോടതിയില്. സിപിഎം നേതൃത്വത്തിന്റെ ഗൂഢാലോചനയുടെ ഭാഗമായാണ് ആക്രമണം, പ്രതികളുടെ ജാമ്യാപേക്ഷയെ എതിര്ത്തുള്ള സത്യവാങ്മൂലത്തില് ഇ ഡി വ്യക്തമാക്കി.
സിഎംആര്എല് കേസന്വേഷണ ഭാഗമായാണ് മേയ് 27നു വീണയുടെ വീട്ടില് പരിശോധിച്ചത്. കേസില് സിപിഎമ്മോ പാര്ട്ടി നേതൃത്വമോ പ്രതികളല്ല. എന്നിട്ടും ഇ ഡി ഉദ്യോഗസ്ഥര്ക്കെതിരേയുണ്ടായ വ്യാപക പ്രതിഷേധത്തിനു പിന്നിലെ ലക്ഷ്യം അന്വേഷണ വിധേയമാണെന്നും ഇ ഡി തുടര്ന്നു.
പരിശോധന ആരംഭിച്ചതിനു പിന്നാലെ സിപിഎം നേതാക്കളുടെയും പ്രവര്ത്തകരുടെയും നേതൃത്വത്തില് പ്രതിഷേധം ശക്തമായി. ഉദ്യോഗസ്ഥരെ ഭീഷണിപ്പെടുത്തി. പരിശോധന അവസാനിപ്പിക്കാനാവശ്യപ്പെട്ടു. സിപിഎം സംസ്ഥാന സെക്രട്ടറി, ജില്ലാ സെക്രട്ടറി ഉള്പ്പെടെ നേതാക്കളുടെ പ്രകോപനപരമായ പ്രസംഗങ്ങള് പ്രവര്ത്തകര്ക്ക് ഇ ഡിയെ ആക്രമിക്കാനുള്ള സിഗ്നലായി.
ഉച്ചയ്ക്ക് പരിശോധന പൂര്ത്തിയാക്കി മടങ്ങിയ ഉദ്യോഗസ്ഥരുടെ വാഹനങ്ങള് നൂറുകണക്കിന് പേരടങ്ങുന്ന സംഘം വളഞ്ഞെന്നും ഇ ഡി കോടതിയില് പറഞ്ഞു. കല്ലും ഇഷ്ടികയും ഇരുമ്പുവടിയുമുപയോഗിച്ച് ആക്രമിച്ചു. ആക്രമണത്തില് ഒരു ഇ ഡി ഉദ്യോഗസ്ഥനും ഒരു സിആര്പിഎഫ് ജവാനും വാഹന ഡ്രൈവര്ക്കും ഗുരുതര പരിക്കേറ്റു.
ഉദ്യോഗസ്ഥരെ കൊല്ലണമെന്ന ഉദ്ദേശ്യത്തോടെയായിരുന്നു ആക്രമണം. പോലീസ് സമയോചിതമായി ഇടപെട്ടില്ലെങ്കില് ഉദ്യോഗസ്ഥര് ആള്ക്കൂട്ട ആക്രമണത്തില് കൊല്ലപ്പെട്ടേനെ. വാഹനങ്ങള് തകര്ത്തതിലൂടെ മൂന്ന് ലക്ഷം രൂപയുടെ നാശനഷ്ടമുണ്ടായി. പൊതുമുതല് നശീകരണ നിയമുള്പ്പെടെ വിവിധ വകുപ്പുകള് പ്രതികള്ക്കെതിരേ ചുമത്തി. സംഭവത്തില് ഗൂഢാലോചന സംബന്ധിച്ച അന്വേഷണം പ്രാരംഭ ഘട്ടത്തിലാണ്.
നിരവധി പ്രതികള് ഇപ്പോഴും ഒളിവിലാണ്. ഈ ഘട്ടത്തില് പ്രതികള്ക്കു ജാമ്യമനുവദിച്ചാല് സാക്ഷികളെ സ്വാധീനിക്കാനും അന്വേഷണത്തെ ബാധിക്കാനും സാധ്യതയുണ്ട്, ഇ ഡി കൂട്ടിച്ചേര്ത്തു.
