തിരുവനന്തപുരം: തലസ്ഥാനത്ത് ഇഡി ഉദ്യോഗസ്ഥരെ ആക്രമിച്ച കേസില് ഒമ്പതാം പ്രതി കടകംപളളി സ്വദേശി ഹരീഷ് കുമാറിന് ജാമ്യം നല്കിയ കീഴ്ക്കോടതി വിധി റദ്ദാക്കണമെന്ന് കാട്ടിയുളള സര്ക്കാരിന്റെ ഹര്ജിയില് പ്രതിക്ക് ഹൈക്കോടതി നോട്ടീസ് അയച്ചു.
വിശദമായ വാദം കേള്ക്കാതെ ജാമ്യം റദ്ദാക്കില്ലെന്ന് ഹൈക്കോടതി പറഞ്ഞു.27 ദിവസം കസ്റ്റഡിയിലുണ്ടായിട്ടും ഒന്പതാം പ്രതിയെ എന്ത് കൊണ്ട് കസ്റ്റഡിയില് ചോദിച്ചില്ലെന്ന് സര്ക്കാരിനോട് ഹൈക്കോടതി ചോദിച്ചു. പബ്ലിക് പ്രോസിക്യൂട്ടറായിരുന്ന അഡ്വ. ഗീനകുമാരി ഒത്തുകളിച്ചെന്ന ആരോപണമുണ്ടെങ്കില് സര്ക്കാരിന് നടപടിയെടുക്കാം. എന്നാല് ഈ ഘട്ടത്തില് സര്ക്കാര് എതിര്കക്ഷിയാക്കിയ ഗീനാകുമാരിക്ക് നോട്ടീസ് അയക്കേണ്ട സാഹചര്യമില്ലെന്നും കോടതി പറഞ്ഞു.
ആക്രമണത്തില് ആര്ക്കെല്ലാം പരിക്കേറ്റെന്നും ഇവരുടെ മെഡിക്കല് രേഖയടക്കം ഹാജരാക്കുന്നുണ്ടോ എന്നും സര്ക്കാരിനോട് ഹൈക്കോടതി ചോദിച്ചു.ഒന്നരമണിക്കൂറില് മൂന്നൂറോളം പേരാണ് സ്ഥലത്ത് ഒത്ത് കൂടിയതെന്നും ഇതില് ഗൂഡാലോചന ഉണ്ടെന്നും സംഘടിതമായ ആക്രമണമാണ് നടന്നതെന്നും സര്ക്കാര് വാദിച്ചു. എന്നാല് സംഘടിതമായ ആക്രമണമെന്ന് പറയാന് കഴിയില്ലെന്ന് കോടതി പറഞ്ഞു. അന്വേഷണ ഉദ്യോഗസ്ഥരെ ആക്രമിക്കുന്ന അസാധാരണ സംഭവമാണ് തിരുവനന്തപുരത്ത് നടന്നതെന്നും സിപിഎം നേതാക്കളുടെ അറിവോടെയാണ് ഇത് നടന്നതെന്നുമാണ് ഇഡി വാദിച്ചത്.
പ്രതിയുടെ ജാമ്യം റദ്ദാക്കണമെന്ന ഇഡിയുടെയും സര്ക്കാരിന്റെയും ഹര്ജി വരുന്ന 13ന് വീണ്ടും പരിഗണിക്കും.
