മുംബൈ: മികച്ച പല ഭക്ഷണശാലകളും ഇപ്പോഴും കാണാമറയത്താണ്. ചില സെലിബ്രിറ്റികളാണ് സോഷ്യല് മീഡിയയിലൂടെ പലപ്പോഴും ഒരു മാജിക് പോലെ ഇത്തരം നല്ല ഭക്ഷണശാലകളെ സാധാരണക്കാരുടെ മനസ്സിലേക്ക് എത്തിക്കുക പതിവ്.
മുംബൈയില് ജീവിക്കുന്ന മഹീന്ദ്ര ആന്റ് മഹീന്ദ്ര ഉള്പ്പെടെ ഒരു പിടി കമ്പനികളുടെ ഉടമയായ ആനന്ദ് മഹീന്ദ്ര തന്റെ സമൂഹമാധ്യമമായ എക്സില് പങ്കുവെച്ചത് കേരളത്തിലെ തിരുവനന്തപുരം ജില്ലയിലെ ഒരു ഹോട്ടലിലെ മസാലദോശയാണ്. കിളിമാനൂരിലെ ചട് ണി മാമി എന്ന ഹോട്ടലിലെ ബാഹുബലി മസാല ദോശകഴിക്കാന് താന് മുംബൈയില് നിന്നും തന്റെ കൊച്ചുമകനോടൊപ്പം കിളിമാനൂരില് പ്രത്യക്ഷനാകുമെന്നാണ് ആനന്ദ് മഹീന്ദ്ര പോസ്റ്റില് പറയുന്നത്.
മഹീന്ദ്ര ഉടമ ആനന്ദ് മഹീന്ദ്ര എക്സില് പങ്കുവെച്ച കിളിമാനൂരിലെ ചട് ണി മാമിയെക്കുറിച്ചുള്ള പോസ്റ്റ്:
I don’t often recommend travelling to locations solely for a culinary experience…
Maybe this one is because my grandson is visiting & he’s a dosa fanatic.
But I have to say, I’d love to be able to teleport the family to ‘Chutney Maami’ for grabbing this Sunday bite together.… pic.twitter.com/D5UlQ9RF5P
— anand mahindra (@anandmahindra) August 9, 2026
ബാഹുബലി മസാലദോശ
ചട് ണി മാമി എന്ന ഹോട്ടല് ദോശ, മസാലദോശ, ഉഴുന്നുവട എന്നിവയ്ക്കെല്ലാം തിരുവനന്തപുരത്തുകാര്ക്കിടയില് പേര് കേട്ട വെജിറ്റേറിയന് ഹോട്ടലാണ്. ഇവിടുത്തെ ബാഹുബലി ദോശയുടെ വീഡിയോയാണ് തന്റെ എക്സിലെ പോസ്റ്റിനൊപ്പം ചേര്ത്തിരിക്കുന്നത്. ഏകദേശം ഒന്നരമീറ്ററാണ് (4.9 അടി) ഈ ബാഹുബലി ദോശയുടെ നീളം. ഇതിനൊപ്പം പ്ലേറ്റില് വിളമ്പുന്ന വിവിധ തരം ചട് ണിയും സാമ്പാറുമാണ് ഈ ബാഹുബലി ദോശയെ രുചികരമാക്കുന്നത്. ഏകദേശം 15 മുതല് 20 തരം ചട് ണികളുണ്ട്. ദോശ പൊട്ടിച്ച് പലതരം ചട് ണികളില് മാറി മാറി മുക്കിയ ശേഷം കഴിക്കുമ്പോഴാണ് ഈ ദോശയുടെ രുചി കൂടുന്നത്.
ഇനി ഈ ബാഹുബലി ദോശ കസ്റ്റമറുടെ മേശയില് എത്തിക്കുന്നത് തന്നെ ഒരു ആചാരത്തോടെയാണ്. മുന്നില് മണി മുഴക്കി ചട് ണി മാമി ഉണ്ടാകും. പിന്നാലെയാണ് വെയിറ്റര് ദോശയും ചുമന്ന് എത്തുക. ദോശ ചുമന്ന് എന്ന് തന്നെ എഴുതേണ്ടിവരും. അത്രയ്ക്കുണ്ടല്ലോ ദോശയുടെ നീളം.
ഈ ബാഹുബലി ദോശ കഴിക്കാന് താന് കൊച്ചുമകനൊപ്പം കിളിമാനൂരിലെ ചട് ണി മാമിയില് പ്രത്യക്ഷനാകുമെന്നാണ് ആനന്ദ് മഹീന്ദ്ര നല്കുന്ന ഉറപ്പ്.
