ഫിലാഡല്ഫിയ: ഗ്രൂപ്പ് ഐയിലെ നിര്ണായക ആവേശപ്പോരാട്ടത്തില് ആഫ്രിക്കന് കരുത്തുമായെത്തിയ ഘാനയെ ഒന്നിനെതിരെ രണ്ട് ഗോളുകള്ക്ക് തകര്ത്ത് ക്രൊയേഷ്യ റൗണ്ട് ഓഫ് 32-ല്. വിജയത്തോടെ ഗ്രൂപ്പില് നിന്നും രണ്ടാം സ്ഥാനക്കാരായാണ് അവരുടെ മുന്നേറ്റം. തോറ്റെങ്കിലും മൂന്നാം സ്ഥാനക്കാരായി ഘാനയും അടുത്ത റൗണ്ടിലേക്ക് മുന്നേറി.
31-ാം മിനിറ്റില് പീറ്റര് സുചിച്, 83-ാം മിനിറ്റില് നിക്കോള വ്ലാസിച്ച് എന്നിവരാണ് ക്രൊയേഷ്യയ്ക്കായി ഗോളടിച്ചത്. 73-ാം മിനിറ്റില് ഡെറിക് ലൂക്കാസന് ഘാനയുടെ ആശ്വാസ ഗോള് കണ്ടെത്തി.
പന്ത് കൈവശം വയ്ക്കുന്നതിലും ഷോട്ടുകള് പായിക്കുന്നതിലും ക്രൊയേഷ്യയായിരുന്നു മുന്പന്തിയില്. 54 ശതമാനം പന്ത് നിയന്ത്രണം വെച്ച ക്രൊയേഷ്യ നാല് ഓര് ടാര്ഗറ്റ് ഷോട്ടുകള് ഉള്പ്പെടെ 8 തവണ എതിര്വല ലക്ഷ്യം വച്ചപ്പോള് ഘാന ഒരു ഓണ് ടാര്ഗറ്റ് ഉള്പ്പെടെ ആറ് ഷോട്ടുകളാണ് പായിച്ചത്.
കളിയുടെ തുടക്കം മുതല് ഇരു ടീമുകളും മികച്ച മുന്നേറ്റങ്ങളുമായി കളം നിറഞ്ഞു. ഘാനയുടെ ഫൗളോടെയായിരുന്നു മത്സരത്തിന്റെ തുടക്കം. 30-ാം മിനിറ്റില് ക്രൊയേഷ്യ താരം ഇവാന് പെരിസിച്ചിന്റെ ഹെഡര് ലക്ഷ്യം കാണാതെ പോയതിനു പിന്നാലെ 32-ാം മിനിറ്റില് ക്രൊയേഷ്യ ആദ്യ ഗോളടിച്ചു. മാറ്റിയോ കൊവാച്ചിചിന്റെ പാസ് സ്വീകരിച്ച് ബോക്സിന് പുറത്തുനിന്ന് പീറ്റര് സുചിച്ച് തൊടുത്ത ഷോട്ട് ഘാന ഗോളിയെ മറികടന്ന് വലയില് കയറി. ഈ ഒരു ഗോളിന് ആദ്യപകുതിയില് ക്രൊയേഷ്യ മുന്നില്.
രണ്ടാം പകുതിയുടെ തുടക്കത്തില് തന്നെ ഘാന നിര്ണായക മാറ്റങ്ങള് വരുത്തി. അബ്ദുല് ഫത്താവു, കോജോ പെപ്ര ഒപ്പോങ് എന്നിവര് പകരക്കാരായി ഘാനയ്ക്കായി കളിക്കാനിറങ്ങി. 47-ാം മിനിറ്റില് ഘാനയ്ക്കായി അബ്ദുല് ഫത്താവുവിന്റെ ഗോള് നീക്കം. പെനാല്റ്റി ഏരിയയ്ക്കു വലതു ഭാഗത്തുനിന്നും ഫത്താവു എടുത്ത ഷോട്ട്, ക്രോസ് ബാറിനു മുകളിലൂടെ പുറത്തേക്കു പോയി. 49-ാം മിനിറ്റില് ഘാന താരം ഫത്താവുവിന്റെ ക്രോസില് അന്റോയിന് സെമന്യോവിന്റെ ഗോള് ശ്രമവും പാഴായി. തുടര്ച്ചയായ മുന്നേറ്റങ്ങള്ക്കൊടുവില് 73-ാം മിനിറ്റില് ഘാന സമനില കണ്ടെത്തി. ക്രൊയേഷ്യ താരം മരിന് പൊങ്ക്രാചിചിന്റെ ഫൗളില് ഘാനയ്ക്ക് അനുകൂലമായി ലഭിച്ച ഫ്രീകിക്കില്നിന്നായിരുന്നു ഗോള്. ബോക്സിനു പുറത്തുനിന്ന് കിക്കെടുത്ത എര്ണസ്റ്റ് നുവാമ ഗോള് ഏരിയയിലേക്കാണു പന്തു നീട്ടിയത്. ഓടിയെത്തിയ ഡെറിക് ലൂക്കാസന് ക്രൊയേഷ്യ ഗോളിയെ മറികടന്ന് ലക്ഷ്യം കണ്ടു. ഇത് ഓഫ് സൈഡാണെന്ന സംശയത്തെ തുടര്ന്ന് ആദ്യം ഗോള് അനുവദിച്ചില്ലെങ്കിലും വാര് പരിശോധനയില് ഗോള് അനുവദിക്കപ്പെടുകയായിരുന്നു. 83-ാം മിനിറ്റില് നിക്കോള വ്ലാസിച്ച് ക്രൊയേഷ്യയുടെ രണ്ടാം ഗോള് നേടി. കോര്ണറില്നിന്ന് ലൂക്ക മോഡ്രിച്ച് നീട്ടി നല്കിയ പന്ത് ഹെഡ്ഡറിലൂടെ വ്ളാസിച്ച് വലയിലെത്തിക്കുകയായിരുന്നു. ഇതോടെ ക്രൊയേഷ്യ 2-1ന് മുന്നില്. ഘാന സമനില ഗോളിനായി പരിശ്രമിച്ചെങ്കിലും കാര്യമുണ്ടായില്ല. ഇതോടെ 2-1ന്റെ വിജയത്തോടെ ഇംഗ്ലണ്ടിന് പിന്നില് രണ്ടാം സ്ഥാനക്കാരായി ക്രൊയേഷ്യ അവസാ 32-ല് ഇടംപിടിച്ചു. ജൂലൈ മൂന്നിന് പുലര്ച്ചെ 4.30ന് നടക്കുന്ന മത്സരത്തില് കരുത്തരായ പോര്ച്ചുഗലാണ് ക്രൊയേഷ്യയുടെ എതിരാളികള്. ജൂലൈ 4ന് രാവിലെ 7ന് ഘാന റൗണ്ട് ഓഫ് 32-ല് കൊളംബിയയെയും നേരിടും.
