തിരുവനന്തപുരം: പ്രമുഖ സ്ഥാപനങ്ങളിലെയും കമ്പനികളിലെയും ഉന്നത ഉദ്യോഗസ്ഥരെയും ധനകാര്യ വിഭാഗം ജീവനക്കാരെയും ലക്ഷ്യമിട്ട് ‘ബോസ് സ്കാം’ (Boss Scam) എന്ന പേരില് അറിയപ്പെടുന്ന പുതിയ സൈബര് തട്ടിപ്പിനെതിരെ ജാഗ്രത പാലിക്കണമെന്ന് പോലീസ്.
ആര്ബിഐ അല്ലെങ്കില് ഔദ്യോഗിക ഓഡിറ്റ് ടീമുകളുടെ പേരില് വ്യാജ അടിയന്തര സന്ദേശങ്ങള് അയച്ച് ഉദ്യോഗസ്ഥരില് പരിഭ്രാന്തി സൃഷ്ടിക്കും. തുടര്ന്ന് സിപ് ഫയലുകളിലൂടെ മാല്വെയര് അടങ്ങിയ ഫയലുകള് ഉപയോഗിച്ച് സ്ഥാപനങ്ങളിലെ കമ്പ്യൂട്ടറുകളുടെ നിയന്ത്രണം കൈക്കലാക്കും. സ്ഥാപനങ്ങളുടെ ഉന്നത ഉദ്യോഗസ്ഥരുടെ വ്യാജപ്രൊഫൈലുകള് നിര്മിക്കുകയോ അല്ലെങ്കില് അവരുടെ അക്കൗണ്ടുകള് കൈക്കലാക്കുകയോ ചെയ്യും.
കമ്പ്യൂട്ടറുകളുടെ നിയന്ത്രണം ലഭിക്കുന്നതോടെ ജീവനക്കാരുടെ വാട്സ്ആപ്പ് വെബ് സംവിധാനം ഉപയോഗിച്ച് സിഇഒമാരുടെ പേരില് വ്യാജ സന്ദേശങ്ങള് അയയ്ക്കും. ഇത്തരം സന്ദേശങ്ങളിലൂടെ അടിയന്തരമായി പണം കൈമാറാന് ആവശ്യപ്പെട്ട് സ്ഥാപനത്തിന്റെ പണം തട്ടിയെടുക്കുന്നതാണ് തട്ടിപ്പ് രീതി. അപരിചിതരില് നിന്ന് ലഭിക്കുന്ന സിപ്, ഇഎക്സ്ഇ, ഡിഎല്എല് ഫയലുകള് യാതൊരു കാരണവശാലും തുറക്കരുത്. സാമ്പത്തിക തട്ടിപ്പിനിരയായാല് ഉടന് തന്നെ 1930 നമ്പരില് അറിയിക്കണമെന്നും പോലീസ് അറിയിച്ചു.
