കണ്ണൂർ : കണ്ണൂർ കോർപ്പറേഷനിലെ 18 യുഡിഎഫ് കൗൺസിലർമാരുടെയും ഒരു എസ്ഡിപിഐ കൗൺസിലറുടെയും സത്യപ്രതിജ്ഞ റദ്ദാക്കണമെന്ന് ആവശ്യപ്പെട്ട് ജില്ലാ കളക്ടർക്ക് ബിജെപി പരാതി നൽകി. അള്ളാഹുവിന്റെ നാമത്തിൽ സത്യപ്രതിജ്ഞ ചെയ്തത് നിയമപരമല്ലെന്നാണ് ബിജെപി കണ്ണൂർ നോർത്ത് ജില്ലാ പ്രസിഡന്റ് കെ.കെ.വിനോദ് കുമാർ നൽകിയ പരാതിയിൽ പറയുന്നത്.
മുസ്ലീം ലീഗ്, കോൺഗ്രസ് അംഗങ്ങളായ 18 പേരും ഒരു എസ്ഡിപിഐ കൗൺസിലറും അള്ളാഹുവിന്റെ നാമത്തിലാണ് സത്യപ്രതിജ്ഞ ചെയ്തത്. ദൈവനാമത്തിലോ ദൃഢപ്രതിജ്ഞയോ ആയിരുന്നില്ല ഇത്. അതിനാൽ ഈ 19 കൗൺസിലർമാരുടെയും സത്യപ്രതിജ്ഞ റദ്ദാക്കണം . തിരുവനന്തപുരം കോർപ്പറേഷനിൽ സ്വീകരിച്ച അതേ നടപടി കണ്ണൂരിലും ബാധകമാണെന്നാണ് ബിജെപി പരാതിയിൽ ചൂണ്ടിക്കാട്ടുന്നത്.
സത്യപ്രതിജ്ഞ സംബന്ധിച്ച നിയമവ്യവസ്ഥകൾ കർശനമായി പാലിക്കപ്പെടേണ്ടവയാണ്. കണ്ണൂർ മേയർ അടക്കം രാജി വയ്ക്കണം . കണ്ണൂർ കോർപ്പറേഷനിൽ മാത്രമല്ല മറ്റ് എവിടെയൊക്കെ ഇത്തരത്തിൽ അള്ളാഹുവിന്റെ പേരിൽ സത്യപ്രതിജ്ഞ ചെയ്തോ അത് റദ്ദാക്കണം . ഭരണഘടനയും ജനപ്രാതിനിധ്യ നിയമവും അനുശാസിക്കുന്ന മാതൃകയിലെ സത്യപ്രതിജ്ഞ ചെയ്യാവൂ. നിയമം അനുശാസിക്കാത്ത വാക്കുകളോ വ്യവസ്ഥകളോ ഉൾപ്പെടുത്തി സത്യപ്രതിജ്ഞ നടത്തുന്നത് പരിശോധിക്കപ്പെടേണ്ട വിഷയമാണെന്നും പരാതിയിൽ പറയുന്നു. ഇതിൽ നടപടി ഉണ്ടായില്ലെങ്കിൽ കോടതിയെ സമീപിക്കാനാണ് തീരുമാനമെന്നും വിനോദ് കുമാർ പറയുന്നു.
