കൊച്ചി: ഹിന്ദുഐക്യവേദിയുടെ നേതൃത്വത്തില്‍ ഹിന്ദു നേതൃസമ്മേളനം ഇന്ന് എറണാകുളത്ത് നടക്കും. രാവിലെ 10 ന് എറണാകുളം പുല്ലേപ്പടി റോഡിലുള്ള ബിഎംഎസ് അന്താരാഷ്‌ട്ര തൊഴിലാളി പഠന കേന്ദ്രം ഹാളില്‍ ചേരുന്ന സമ്മേളനം ജുന അഖാഡ മഹാമണ്ഡലേശ്വര്‍ ആനന്ദവനം ഭാരതി സ്വാമി ഉദ്ഘാടനം ചെയ്യും. സംസ്ഥാന അധ്യക്ഷന്‍ ആര്‍.വി. ബാബു അധ്യക്ഷത വഹിക്കും. 150 ഓളം ഹിന്ദു സംഘടനകളെ പ്രതിനിധീകരിച്ച് 300 ലേറെ നേതാക്കള്‍ യോഗത്തില്‍ പങ്കെടുക്കും.
നേതൃസമ്മേളനത്തില്‍ കേന്ദ്ര സര്‍വകലാശാല മുന്‍ പ്രോ.വൈസ് ചാന്‍സലര്‍ ഡോ. കെ. ജയപ്രസാദ് വിഷയാവതരണം നടത്തും. സമാപന സമ്മേളനത്തില്‍ സീമാ ജാഗരണ്‍ മഞ്ച് ദേശീയ സംയോജക് എ. ഗോപാലകൃഷ്ണന്‍ മുഖ്യപ്രഭാഷണം നടത്തും. കെ.പി. ശശികല ടീച്ചര്‍ അധ്യക്ഷത വഹിക്കും.
ഹിന്ദു സമാജം നേരിടുന്ന എല്ലാ വെല്ലുവിളികളും ആത്മവിശ്വാസത്തോടെയും ആത്മധൈര്യത്തോടെയും ചോദ്യം ചെയ്യുകയും അത് പരിഹരിക്കുകയും സാമൂഹ്യനീതി നിലനിര്‍ത്തുകയും ചെയ്യുക എന്നതാണ് നേതൃസമ്മേളനം ലക്ഷ്യമിടുന്നത്. കേരളത്തില്‍ ഹിന്ദുക്കളെ രണ്ടാംതരം പൗരന്മാരായി മാത്രം ഭരണകൂടം കണക്കാക്കുന്ന സാഹചര്യത്തില്‍ ഹിന്ദു ഏകീകരണം ശക്തിപ്പെടുത്തേണ്ടതിന്റെ അനിവാര്യത യോഗം ചര്‍ച്ച ചെയ്യും. അധഃസ്ഥിത, പിന്നോക്ക വിഭാഗങ്ങളുടെ സംവരണമുള്‍പ്പെടെയുള്ള അവകാശങ്ങള്‍ സംഘടിത മതവിഭാഗങ്ങള്‍ക്ക് പകുത്ത് കൊടുക്കുകയും അവരുടെ വികസന ഫണ്ടുകള്‍ പാഴാക്കിക്കളയുകയും വെട്ടിച്ചുരുക്കുകയും ചെയ്യുന്നതിനെ സംബന്ധിച്ച് ഹിന്ദു നേതൃസമ്മേളനം ചര്‍ച്ച ചെയ്യും.
