കൊച്ചി: തനിക്ക് കിട്ടിയ രാജ്യത്തിന്റെ പരമോന്നത ആദരവ് സമുദായത്തിന് ലഭിച്ച അംഗീകാരമാണെന്ന് എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്. താന് അതിലേക്കുള്ള പാത മാത്രമായിരുന്നു. രാഷ്ട്രപതിയില് നിന്ന് പദ്മഭൂഷന് ബഹുമതി ഏറ്റുവാങ്ങിയ വെള്ളാപ്പള്ളി നടേശന് എറണാകുളം ടൗണ്ഹാളില് നല്കിയ വരവേല്പ്പിന് നന്ദി രേഖപ്പെടുത്തുകയായിരുന്നു അദ്ദേഹം. ഒരു രാഷ്ട്രീയ പാര്ട്ടിയോടും മറ്റ് മത സംഘടനകളോടും ഞാന് എതിരല്ല. സമുദായത്തിന് ലഭിക്കേണ്ട അവകാശങ്ങളെപ്പറ്റി സംസാരിക്കുമ്പോള് തന്നെ മുസ്ലിം വിരുദ്ധനാക്കി ചിത്രീകരിക്കാനാണ് ചിലര് ശ്രമിച്ചത്. പദ്മഭൂഷണ് ലഭിച്ചതിനെയും അത്തരത്തില് ദിശ മാറ്റി ചര്ച്ചയ്ക്ക് വച്ചുവെന്നും അത്തരത്തില് ഒരു വര്ഗീയ ചിന്തയും ഇല്ലെന്നും വെള്ളാപ്പള്ളി പറഞ്ഞു.
ജാതിയുടെ പേരില് നീതി നിഷേധിക്കപ്പെട്ട സമൂഹത്തിന് സാമൂഹ്യ നീതി നേടുന്നതിന് വേണ്ടി താന് ഇനിയും ജാതി പറയുമെന്നും, അടിമകളാക്കി നിര്ത്താനുള്ള രാഷ്ട്രീയചിന്തകള്ക്കെതിരെ എന്നും മുന്നില് തന്നെ ഉണ്ടാകുമെന്നും അദ്ദേഹം പറഞ്ഞു.
ടൗണ്ഹാളില് ഒരുക്കിയിരുന്ന മൂന്ന് വേദിയിലെയും ആയിരങ്ങളെ അഭിവാദ്യം ചെയ്തശേഷം അദ്ദേഹം ഗുരു പ്രതിമയില് അംഗീകാരം സമര്പ്പിച്ച് ദീപപ്രോജ്വലനം നടത്തി. ജില്ലയിലെ മുഴുവന് യൂണിയന് കമ്മിറ്റികളുടെയും പോഷക സംഘടനകളുടേയും സംയുക്താഭിമുഖ്യത്തിലാണ് സ്വീകരണം ഒരുക്കിയത്.
എസ്എന്ഡിപി യോഗം പ്രസിഡന്റ് ഡോ. എം.എന്. സോമന് സ്വീകരണ സമ്മേളനത്തില് അധ്യക്ഷത വഹിച്ചു. യോഗം ദേവസ്വം സെക്രട്ടറി അരയാക്കണ്ടി സന്തോഷ്, എസ്എന് ട്രസ്റ്റ് ട്രഷറര് ഡോ. ജയദേവന്, സ്വാഗതസംഘം ചെയര്മാന് മഹാരാജാ ശിവാനന്ദന്, ജനറല് കണ്വീനര് ഷൈജു മനയ്ക്കപ്പടി, പബ്ലിസിറ്റി ചെയര്മാന് അഡ്വ. സിനില് മുണ്ടപ്പിള്ളി ജില്ലാ യൂണിയനുകളിലെ ഒട്ടേറെ ആളുകള് എന്നിവര് പങ്കെടുത്തു.
