ലോകം മുഴുവൻ ഇന്ത്യയിലേക്ക് ഉറ്റുനോക്കുന്നു : ഇന്ത്യ-യൂറോപ്യൻ യൂണിയൻ സ്വതന്ത്ര വ്യാപാര കരാർ ഡിസംബറോടെ പ്രാബല്യത്തിൽ വരുമെന്ന് പിയൂഷ് ഗോയൽ

മുംബൈ: ഇന്ത്യയും യൂറോപ്യൻ യൂണിയനും ദീർഘകാലമായി കാത്തിരുന്ന സ്വതന്ത്ര വ്യാപാര കരാറിൽ ഈ വർഷം ഡിസംബറോടെ ഒപ്പുവെക്കുമെന്ന് പ്രതീക്ഷിക്കുന്നതായി കേന്ദ്ര വാണിജ്യ വ്യവസായ മന്ത്രി പീയൂഷ് ഗോയൽ. 2027 ഫെബ്രുവരി-മാർച്ച് മാസങ്ങളിൽ കരാർ പ്രാബല്യത്തിൽ വരുമെന്ന് അദ്ദേഹം ഞായറാഴ്ച പറഞ്ഞു. കൂടാതെ വിവിധതരം വസ്തുക്കളുടെ തീരുവ കുറയ്‌ക്കുന്നതിലൂടെ യൂറോപ്യൻ വിപണിയിലേക്കുള്ള ഇന്ത്യയുടെ പ്രവേശനം ഈ കരാർ ഗണ്യമായി വർദ്ധിപ്പിക്കുമെന്ന് ചാർട്ടേഡ് അക്കൗണ്ടന്റുമാരെ അഭിസംബോധന ചെയ്തുകൊണ്ട് മന്ത്രി പറഞ്ഞു.

“ഇപ്പോൾ, തീരുവ ഏതാണ്ട് പൂജ്യം മാത്രമായതിനാൽ, മിക്കവാറും മുഴുവൻ യൂറോപ്യൻ വിപണിയും ഞങ്ങൾക്ക് വേണ്ടി തുറന്നിരിക്കും. ഡിസംബറോടെ EU യുടെ FTA ഒപ്പുവെക്കുകയും ഫെബ്രുവരി-മാർച്ച് മാസങ്ങളിൽ പ്രാബല്യത്തിൽ വരികയും ചെയ്യും,”- മന്ത്രി കൂട്ടിച്ചേർത്തു.

ആഗോള സമ്പദ്‌വ്യവസ്ഥയിൽ ഇന്ത്യയുടെ വർദ്ധിച്ചുവരുന്ന പ്രാധാന്യത്തെയും മന്ത്രി എടുത്തുപറഞ്ഞു. ലോകമെമ്പാടുമുള്ള രാജ്യങ്ങൾ ഇന്ത്യയുമായുള്ള സാമ്പത്തിക പങ്കാളിത്തം ശക്തിപ്പെടുത്താൻ താൽപ്പര്യപ്പെടുന്നുണ്ട്. ലോകം മുഴുവൻ ഇന്ത്യയിലേക്ക് ഉറ്റുനോക്കുകയാണെന്നും ഗോയൽ പറഞ്ഞു.

ഇതിനുപുറമെ ഇരു രാജ്യങ്ങളും തമ്മിലുള്ള നിർദ്ദിഷ്ട ഉഭയകക്ഷി വ്യാപാര കരാറിനെക്കുറിച്ചുള്ള ചർച്ചകൾക്കായി യുഎസ് വ്യാപാര പ്രതിനിധി ജാമിസൺ ഗ്രീർ ഈ ആഴ്ച ഇന്ത്യ സന്ദർശിക്കുമെന്നും മന്ത്രി വെളിപ്പെടുത്തി.
സിഎമാരുമായുള്ള ആശയവിനിമയത്തിനിടെ സാമ്പത്തിക വളർച്ചയ്‌ക്കൊപ്പം ഇന്ത്യയുടെ സാംസ്‌കാരിക പൈതൃകം സംരക്ഷിക്കേണ്ടതിന്റെ പ്രാധാന്യവും ഗോയൽ അടിവരയിട്ടു. പ്രധാനമന്ത്രി നരേന്ദ്ര മോദിയുടെ രാജ്യത്തിനായുള്ള ദർശനത്തെക്കുറിച്ച് പരാമർശിക്കവേ വികസനവും പൈതൃകവും പരസ്പരം കൈകോർക്കണമെന്ന് അദ്ദേഹം പറഞ്ഞു.

“രാജ്യത്തിന് വികസനം ആവശ്യമാണെന്ന് പ്രധാനമന്ത്രി നരേന്ദ്ര മോദി എപ്പോഴും നമ്മളോട് പറയാറുണ്ട്, അതുപോലെ തന്നെ രാഷ്‌ട്രത്തിന് അതിന്റെ പൈതൃകവും ആവശ്യമാണ്. ഒരു രാജ്യവും അതിന്റെ സംസ്കാരം, പൈതൃകം, പാരമ്പര്യങ്ങൾ എന്നിവ പരിപാലിക്കാതെ വികസിത രാഷ്‌ട്രമായി മാറിയിട്ടില്ല,” – ഗോയൽ പറഞ്ഞു.

അതേ സമയം തന്നെ ഗോയൽ ‘എല്ലാ ഇടപാടുകളുടെയും മാതാവ് ‘ എന്ന് വിശേഷിപ്പിച്ചതിന്റെ ചർച്ചകൾ അവസാനിച്ചതായി ഇന്ത്യയും 27 രാജ്യങ്ങളുള്ള യൂറോപ്യൻ യൂണിയനും ജനുവരി 27 ന് പ്രഖ്യാപിച്ചിരുന്നു. നിർദ്ദിഷ്ട കരാർ പ്രകാരം ഇന്ത്യൻ കയറ്റുമതിയുടെ ഏകദേശം 93 ശതമാനത്തിനും യൂറോപ്യൻ യൂണിയൻ വിപണിയിലേക്ക് തീരുവ രഹിത പ്രവേശനം ലഭിക്കുമെന്നാണ് പ്രതീക്ഷിക്കുന്നത്.