തിരുവനന്തപുരം: കാര്ഷിക മേഖലയിലെ അമിത വളപ്രയോഗവും കീടനാശിനി ഉപയോഗവും മനുഷ്യന്റെ ആരോഗ്യത്തെയും മണ്ണിന്റെ ഫലഭൂയിഷ്ഠതയെയും ഗുരുതരമായി ബാധിക്കുമെന്ന് കേന്ദ്രമന്ത്രി സുരേഷ് ഗോപി. രാസവളങ്ങള് മണ്ണില് അവശേഷിപ്പിക്കുന്ന മാരക രാസവസ്തുക്കള് മനുഷ്യരിലും സസ്യങ്ങളിലും ഗുരുതരമായ ആരോഗ്യപ്രശ്നങ്ങളാണ് ഉണ്ടാക്കുന്നത്. ജൈവകൃഷിയിലേക്ക് വലിയൊരു വിഭാഗം കര്ഷകര് ആകര്ഷിക്കപ്പെടുന്നുണ്ട് എന്നത് പ്രത്യാശ നല്കുന്നുവെന്നും അദ്ദേഹം പറഞ്ഞു. പിഎം കിസാന് സമ്മാന് നിധിയുടെ 23-ാം ഗഡു വിതരണം ശ്രീകാര്യം കേന്ദ്ര കിഴങ്ങുവിള ഗവേഷണ കേന്ദ്രത്തില് ഉദ്ഘാടനം ചെയ്യുകയായിരുന്നു അദ്ദേഹം.
ഉത്പന്നങ്ങളുടെ വലിപ്പത്തിലോ തൂക്കത്തിലോ അല്ല, മറിച്ച് അതിലെ സത്യസന്ധതയിലാണ് കര്ഷകന് വിശ്വസിക്കേണ്ടത്. ഇത്തരം ഉത്പന്നങ്ങള് വാങ്ങില്ല എന്ന് ഉപഭോക്താക്കള് തീരുമാനിച്ചാല് മാത്രമേ ഇത്തരം ഹാനികരമായ പ്രവണതകള്ക്ക് വിരാമമിടാന് സാധിക്കൂ. കര്ഷക സമൂഹത്തിന് നല്ലൊരു ദിശാബോധം നല്കാനും, രാജ്യത്തിന്റെ മൂല്യങ്ങള് ഉയര്ത്തിപ്പിടിച്ച് മുന്നേറാനും ഓരോ പൗരനും സാധിക്കണമെന്നും അദ്ദേഹം പറഞ്ഞു. പശ്ചിമേഷ്യന് പ്രതിസന്ധി ലോകത്തെ മുഴുവന് ബാധിക്കുമ്പോഴും അതിനെ പ്രതിരോധിച്ച് തലയുയര്ത്തി നില്ക്കാന് ഭാരതത്തിന് സാധിച്ചത് അഭിമാനകരമായ കാര്യമാണ്. മാധ്യമങ്ങളിലൂടെ വരുന്ന ചില ചോദ്യങ്ങള് സത്യത്തെ അസത്യമാക്കാന് വേണ്ടിയും രാജ്യത്തിന്റെ അന്തസിനെ ചോദ്യം ചെയ്യുന്നതും മാത്രമാണ്. കൃത്യമായ വിവരങ്ങള് മന്ത്രാലയം എല്ലാ ആഴ്ചയും ഔദ്യോഗികമായി പുറത്തുവിടുന്നുണ്ടെന്നും അദ്ദേഹം ചൂണ്ടിക്കാട്ടി.
ഐസിഎആര്-സിറ്റിസിആര്ഐ ഡയറക്ടര് ഡോ. ജി. ബൈജു, ഡിവിഷന് ഓഫ് ക്രോപ് പ്രൊഡക്ഷന് ഹെഡ് (ഐസിഎആര്-സിറ്റിസിആര്ഐ) ഡോ. ജി. സുജ, ആലത്തറ വാര്ഡ് കൗണ്സിലര് കെ.പി. ബിന്ദു, മാതൃകാ കര്ഷകന് സി.വി. ചന്ദ്രകുമാര് എന്നിവര് സംസാരിച്ചു. ശാസ്ത്രജ്ഞര്, കാര്ഷിക വിപുലീകരണ ഉദേ്യാഗസ്ഥര്, സംരംഭകര്, വിദ്യാര്ത്ഥികള്, നെടുമങ്ങാട്-ചുള്ളിമാനൂര്-ഉഴമലയ്ക്കല് മേഖലകളിലെ കര്ഷകര് തുടങ്ങി നാനൂറോളം പേര് പങ്കെടുത്തു.
പ്രധാനമന്ത്രി നരേന്ദ്ര മോദി പിഎം കിസാന് സമ്മാന് നിധി പദ്ധതിയുടെ 23-ാം ഗഡു വിതരണം ചെയ്യുന്ന ചടങ്ങിന്റെ തത്സമയ സംപ്രേഷണം പ്രദര്ശിപ്പിച്ചു. ബംഗാളിലെ ഹൂഗ്ലി ജില്ലയിലെ താരകേശ്വറില് നടന്ന ദേശീയ പരിപാടിയിലൂടെ ഗുണഭോക്താക്കളുടെ ബാങ്ക് അക്കൗണ്ടുകളിലേക്ക് 4.28 കോടി രൂപ പ്രധാനമന്ത്രി നേരിട്ട് നിക്ഷേപിക്കുകയും ചെയ്തു.
