കോട്ടയം: കാലവര്‍ഷം ജൂണ്‍ ആദ്യ പകുതി പിന്നിട്ടപ്പോള്‍ സംസ്ഥാനത്ത് 17 ശതമാനം മഴ കുറവ്. 18-ാം തീയതിവരെയുള്ള കണക്കുകളനുസരിച്ചാണിത്. ആലപ്പുഴ, കണ്ണൂര്‍, ഇടുക്കി, കാസര്‍കോട്, പാലക്കാട്, തൃശൂര്‍, വയനാട് ജില്ലകളില്‍ മഴക്കുറവ് രേഖപ്പെടുത്തി. കോട്ടയം, എറണാകുളം, കൊല്ലം, കോഴിക്കോട്, മലപ്പുറം, പത്തനംതിട്ട ജില്ലകളില്‍ സാധാരണ രീതിയില്‍ മഴ പെയ്തു. തിരുവനതപുരം ജില്ലയില്‍ സാധാരണയിലും വളരെക്കൂടുതല്‍ മഴ ലഭിച്ചു. 212.4 മില്ലി മീറ്റര്‍ ലഭിക്കേണ്ട സ്ഥാനത്ത് 269.9 മില്ലി മീറ്ററാണ് കിട്ടിയത്്. 27 ശതമാനമാണ് കൂടുതല്‍. ഏറ്റവും കുറവ് മഴ ലഭിച്ചത് വയനാട് ജില്ലയിലാണ്. 50 ശതമാനമാണ് മഴക്കുറവ്. അണക്കെട്ടുകള്‍ കൂടുതലുള്ള ഇടുക്കി ജില്ലയില്‍ 42 ശതമാനം കുറവു മഴയേ ലഭിച്ചുള്ളൂ. 397.5 മില്ലി മീറ്റര്‍ ലഭിക്കേണ്ടണ്ട സ്ഥാനത്ത് 230.5 മില്ലി മീറ്ററാണ് കിട്ടിയത്.
ഇന്ന് മഴ മുന്നറിയിപ്പില്ല
വെള്ളി, ശനി ദിവസങ്ങളില്‍ സംസ്ഥാനത്ത് മഴ മുന്നറിയിപ്പില്ല. 21, 22 തീയതികളില്‍ മലപ്പുറം, കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളില്‍ കേന്ദ്ര കാലാവസ്ഥ വകുപ്പ് മഞ്ഞ അലര്‍ട്ട് പ്രഖ്യാപിച്ചു. ഇടിമിന്നലോടു കൂടിയ ഒറ്റപ്പെട്ട ശക്തമായ മഴയ്‌ക്കുള്ള സാധ്യതയാണ് പ്രവചിച്ചിരിക്കുന്നത്.
