കൊച്ചി: ശബരിമല സ്വര്‍ണക്കൊള്ള കേസില്‍ അന്തിമ റിപ്പോര്‍ട്ട് എന്ന് നല്‍കുമെന്ന് ഈ മാസം 29നകം അറിയിക്കാന്‍ പ്രത്യേക അന്വേഷണ സംഘത്തിന് ഹൈക്കോടതി നിര്‍ദ്ദേശം നല്‍കി.കുറ്റപത്രം സമര്‍പ്പിക്കുന്നത് ഇനിയും നീട്ടിക്കൊണ്ടുപോകാനാകില്ല.
അന്വേഷണം പൂര്‍ത്തിയാക്കാന്‍ ആവശ്യത്തിലധികം സാവകാശം ഇതിനകം തന്നെ നല്‍കിയിട്ടുണ്ടെന്ന് ഹൈക്കോടതി പറഞ്ഞു. 2025 ല്‍ പി.എസ്.പ്രശാന്ത് ദേവസ്വം ബോര്‍ഡ് പ്രസിഡന്റായിരുന്നപ്പോള്‍ ദ്വാരപാലക പാളികള്‍ സ്വര്‍ണം പൂശാന്‍ ചെന്നൈയിലേക്ക് കൊണ്ടുപോയ കാര്യങ്ങളും അന്വേഷിക്കണമെന്ന് ഹൈക്കോടതി നേരത്തെ ആവശ്യപ്പെട്ടിരുന്നു. അതേസമയം അന്വേഷണ പുരോഗഗതി റിപ്പോര്‍ട്ട് പ്രത്യേക അന്വേഷണ സംഘം കോടതിക്ക് കൈമാറി.
പാളികള്‍ അഴിച്ചെടുത്ത് കൊണ്ടുപോയതില്‍ ദേവസ്വം ബോര്‍ഡിലെ ഉദ്യോഗസ്ഥരടക്കം ആര്‍ക്കൊക്കെ വീഴ്ചപറ്റിയെന്ന് അന്വേഷണ സംഘം കോടതിയെ അറിയിച്ചു.അന്തിമ കുറ്റപത്രം അടുത്ത മാസം പകുതിയോടെ സമര്‍പ്പിച്ചേക്കുമെന്നാണ് സൂചന.
