കൊല്‍ക്കത്ത: തൃണമൂല്‍ കോണ്‍ഗ്രസില്‍ നിന്ന് പുറത്താക്കപ്പെട്ട അംഗത്തെ പ്രതിപക്ഷ നേതാവായി അംഗീകരിക്കാന്‍ പശ്ചിമ ബംഗാള്‍ നിയമസഭാ സ്പീക്കര്‍ക്ക് കഴിയുമോ എന്ന് കൊല്‍ക്കത്ത ഹൈക്കോടതി. ഹര്‍ജി ജസ്റ്റിസ് കൃഷ്ണ റാവു വിധി പറയാന്‍ മാറ്റിവച്ചു.
പശ്ചിമ ബംഗാള്‍ നിയമസഭയില്‍ വിമത എംഎല്‍എ ഋതബ്രത ബാനര്‍ജിയെ പ്രതിപക്ഷ നേതാവായി നിയമിച്ച സ്പീക്കറുടെ തീരുമാനത്തെ ചോദ്യം ചെയ്ത് മുതിര്‍ന്ന തൃണമൂല്‍ കോണ്‍ഗ്രസ് നേതാവ് ശോഭന്ദേബ് ചതോപാധ്യായ സമര്‍പ്പിച്ച ഹര്‍ജി പരിഗണിക്കുകയായിരുന്നു കോടതി.
വിമത എംഎല്‍എമാരെ പുറത്താക്കിയതായി അറിയിപ്പ് ലഭിച്ചതിനു ശേഷവും സ്പീക്കര്‍ക്ക് തീരുമാനവുമായി മുന്നോട്ട് പോകാന്‍ കഴിയുമായിരുന്നോ എന്ന് കോടതി ചോദിച്ചു. പുറത്താക്കല്‍ പാര്‍ട്ടിയുടെ ആഭ്യന്തര കാര്യമായതിനാല്‍ അത് പ്രാധാന്യമര്‍ഹിക്കുന്നില്ലെന്ന വാദം കോടതി തള്ളി.
എംഎല്‍എമാരുടെ സംഖ്യാബലത്തെ ആശ്രയിച്ച് സ്പീക്കര്‍ ശരിയായ രീതിയിലാണ് പ്രവര്‍ത്തിച്ചതെന്ന് പ്രതിപക്ഷ നേതാവ് ഋതബ്രത ബാനര്‍ജിയെയും ചീഫ് വിപ്പ് അഖ്രുസ്സാമനെയും പ്രതിനിധീകരിച്ച് മുതിര്‍ന്ന അഭിഭാഷകന്‍ ജയ്ദീപ് കര്‍ പറഞ്ഞു .
