കോഴിക്കോട്: നിപ ബാധിച്ച് മെഡിക്കല് കോളേജ് ആശുപത്രിയില് ചികിത്സയിലുള്ള രോഗി വെന്റിലേറ്ററില് തുടരുന്നു. ഐസിഎംആര് മാനദണ്ഡപ്രകാരം രണ്ടാം ഡോസ് മോണോക്ളോണല് ആന്റിബോഡി രോഗിക്ക് നല്കി.
രോഗബാധിതന്റെ പ്രാഥമിക സമ്പര്ക്കപ്പട്ടികയിലുള്ള ആരോഗ്യപ്രവര്ത്തകയുടെ രണ്ടാം പരിശോധനാ ഫലവും നെഗറ്റീവ് ആണ്.നിരീക്ഷണത്തിനായി ആശുപത്രിയില് പ്രവേശിപ്പിച്ചിരുന്ന ഏഴ് പേരില് രോഗിയുടെ ഏറ്റവും അടുത്ത ബന്ധുക്കളായ രണ്ടുപേരെ രോഗലക്ഷണങ്ങള് മാറിയതിനാല് ഇന്ന് ഡിസ്ചാര്ജ് ചെയ്തു. ഇവരുടെ പരിശോധനാഫലം നെഗറ്റീവ് ആയിരുന്നു.
എന്നാല് സമ്പര്ക്കപ്പട്ടികയില് ഉള്പ്പെട്ട് ക്വാറന്റൈനില് ആയിരുന്ന രോഗിയുടെ അടുത്ത ബന്ധു കൂടിയായ ഒരാളെ നിരീക്ഷണത്തിനായി തിങ്കളാഴ്ച മെഡിക്കല് കോളേജ് ആശുപത്രിയില് പ്രവേശിപ്പിച്ചു. നിലവില് ആകെ ആറ് പേര് ആശുപത്രിയില് നിരീക്ഷണത്തിലുണ്ട്. സമ്പര്ക്കപ്പട്ടികയില് ഉളള ഒരു ആരോഗ്യ പ്രവര്ത്തകയുടെ സാമ്പിള് കൂടി ഇന്ന് പരിശോധനയ്ക്കായി അയച്ചു.
ജില്ലയില് പുതിയ നിപ കേസുകള് ഒന്നും റിപ്പോര്ട്ട് ചെയ്യുകയോ സമ്പര്ക്കപ്പട്ടികയില് പുതുതായി ആരെയും ഉള്പ്പെടുത്തുകയോ ചെയ്തിട്ടില്ല. നിലവില് സമ്പര്ക്കപ്പട്ടികയില് 103 പേരാണുള്ളത്. ഇ സമ്പര്ക്ക പട്ടികയില് 45 പേര് ആരോഗ്യപ്രവര്ത്തകരാണ്.
ജയ്പൂര്
അതിനിടെ, നിപ നിരീക്ഷണ പ്രവര്ത്തനങ്ങളുടെ ഭാഗമായി എത്തിയ കേന്ദ്ര സംഘം രോഗബാധിതന് ആദ്യം ചികിത്സ തേടിയ ഫറോക്കിലെ സ്വകാര്യ ആശുപത്രിയില് സന്ദര്ശനം നടത്തി.രോഗബാധ റിപ്പോര്ട്ട് ചെയ്ത രാമനാട്ടുകര മുനിസിപ്പാലിറ്റി ഡിവിഷന് 5 ലെ 46 വീടുകളില് കൂടി ഇന്ന് ആരോഗ്യ പ്രവര്ത്തകര് എത്തി.
