തിരുവനന്തപുരം: സംസ്ഥാനത്ത് ഇന്ന് ഏഴ് ഷിഗെല്ല രോഗബാധ കൂടി റിപ്പോര്ട്ട് ചെയ്തു. ഒരു മരണം കൂടി സ്ഥിരീകരിച്ചു.
നിപ രോഗബാധിതന്റെ സമ്പര്ക്ക പട്ടികയില് ഇന്ന് പുതുതായി ആരെയും ഉള്പ്പെടുത്തിയിട്ടില്ല. നിലവില് 104 പേരാണ് സമ്പര്ക്ക പട്ടികയില് ഉള്ളത്. ഇതില് നാല് പേര് വളരെ ഉയര്ന്ന റിസ്ക് ഭാഗത്തില്പ്പെട്ടവരാണ്. 14 പേര് ഉയര്ന്ന ഭാഗത്തില് പെട്ടവരും 86 പേര് കുറഞ്ഞ റിസ്ക് ഭാഗത്തില്പ്പെട്ടവരും ആണ്. രോഗി കോഴിക്കോട് മെഡിക്കല് കോളജില് വെന്റിലേറ്ററില് തുടരുകയാണ്.
രോഗബാധ റിപ്പോര്ട്ട് ചെയ്ത രാമനാട്ടുകര മുനിസിപ്പാലിറ്റി ഡിവിഷന് 5 ലെ 49 വീടുകളില് കൂടി ആരോഗ്യ പ്രവര്ത്തകര് ഇന്ന് സന്ദര്ശനം നടത്തി.
കോഴിക്കോട്, തിരുവനന്തപുരം 2 വീതം, തൃശൂര്, മലപ്പുറം, വയനാട് ഒന്നു വീതം എന്നിങ്ങനെയാണ് ഇന്ന് ഷിഗെല്ല രോഗ ബാധ റിപ്പോര്ട്ട് ചെയ്തത്. സംസ്ഥാനത്ത് ജൂണ് മാസം 140 ഷിഗെല്ല രോഗബാധയും 6 മരണവും റിപ്പോര്ട്ട് ചെയ്തിട്ടുണ്ട്. കോഴിക്കോട് സ്വദേശിനിയായ മധ്യവയസ്കയാണ് മരണമടഞ്ഞത്. ഈ വര്ഷം ഇതുവരെ 216 പേര്ക്ക് ഷിഗെല്ല രോഗബാധ സ്ഥിരീകരിച്ചു.
