ആലപ്പുഴ: ടി20 ക്രിക്കറ്റില് ആവേശമായ 15കാരന് വൈഭവിനെ എല്ലാവര്ക്കും അറിയാം. ഇപ്പോഴിതാ 13 വയസ്സ് മാത്രം പ്രായമുള്ള കേരളത്തിലെ ആലപ്പുഴയില് നിന്നുള്ള മറ്റൊരു വൈഭവ് തരംഗം സൃഷ്ടിക്കുകയാണ്. ആലപ്പുഴയിലെ ഈ 13കാരനായ വൈഭവ് ലളിതാസഹസ്രനാമത്തിലെ തത്വങ്ങളെ ലളിതമായ ഇംഗ്ലീഷില് പരിചയപ്പെടുത്തുന്ന ഒരു പുസ്തകം രചിച്ചതിന്റെ പേരിലാണ് അത്ഭുതമായി മാറിയിരിക്കുന്നത്.
ഈ വൈഭവിനെ ലോകത്തിന് പരിചയപ്പെടുത്തിയത് ആലപ്പുഴ ജില്ലാ കളക്ടര് ഷാജി വി നായരാണ്. വൈഭവിനെക്കുറിച്ചുള്ള അദ്ദേഹത്തിന്റെ സമൂഹമാധ്യമ പോസ്റ്റ് ഇങ്ങിനെയാണ്:” ശ്രീ ലളിത സഹസ്രനാമത്തിലെ തത്ത്വങ്ങളെ ലളിതമായ ഇംഗ്ലീഷിൽ, എ ഡിവൈൻ വോയേജ് (A Divine Voyage ) എന്ന പുസ്തകം രചിച്ച 13 കാരനായ വൈഭവ് എന്ന കൊച്ചു മിടുക്കൻ കഴിഞ്ഞ ദിവസം എന്നെ കാണാൻ എത്തി. കായംകുളം ശ്രീനാരായണ സെൻട്രൽ സ്കൂളിലെ എട്ടാം ക്ലാസ് വിദ്യാർത്ഥിയാണ് വൈഭവ്. കൊച്ചുകുട്ടികൾക്ക് വരെ എളുപ്പത്തിൽ മനസ്സിലാക്കാൻ പാകത്തിൽ ചിട്ടപ്പെടുത്തിയ ഈ പുസ്തകത്തിന് ഇന്ത്യ ബുക്ക്സ് ഓഫ് റെക്കോർഡ്സ്’ അംഗീകാരവും ലഭിച്ചു.ഈ സന്തോഷം പങ്കുവെക്കുവാനാണ് വൈഭവ് എന്നെ കാണാൻ വന്നത്”
അറിവിന്റെ ലോകത്ത് വലിയ ചുവടുവെപ്പുകൾ നടത്തുന്ന വൈഭവ് എ. പിള്ളയ്ക്ക് എല്ലാവിധ ഭാവുകങ്ങളും നേരുന്നതായും ആലപ്പുഴ ജില്ലാകളക്ടര് കുറിച്ചു.
