തിരുവനന്തപുരം: കെഎസ്ആർടിസി ബസുകളിലെ സ്ത്രീകളുടെ സൗജന്യ യാത്രാ പദ്ധതിയുടെ ഉദ്ഘാടനം സിപിഐഎം എംഎൽഎമാർ ബഹിഷ്കരിക്കുമെന്ന് പാർട്ടി സംസ്ഥാന സെക്രട്ടറി എം.വി. ഗോവിന്ദൻ. കോൺഗ്രസ് പറയുന്നത് ഒന്നാണെന്നും എന്നാൽ നടപ്പാക്കുന്നത് മറ്റൊന്നാണെന്നും അദ്ദേഹം കുറ്റപ്പെടുത്തി. ഓർഡിനറി ബസുകളിൽ മാത്രമല്ല സൗജന്യ യാത്രയെന്നാണ് കോൺഗ്രസ് നേരത്തെ പ്രഖ്യാപിച്ചിരുന്നത്. എന്നാൽ ഇപ്പോൾ നിലപാട് മാറ്റി. മലബാർ മേഖലയിൽ ആവശ്യത്തിന് ഓർഡിനറി ബസുകൾ പോലുമില്ലാത്ത സാഹചര്യത്തിൽ, പുതിയ പ്രഖ്യാപനം വെറും ആളെ പറ്റിക്കലാണെന്ന് എം.വി. ഗോവിന്ദൻ വാർത്താസമ്മേളനത്തിൽ പറഞ്ഞു.
ശബരിമല സ്വർണ്ണക്കൊള്ളയുമായി ബന്ധപ്പെട്ട് മുൻപ് പാർട്ടി നടപടി നേരിട്ട എ. പത്മകുമാറിന്റെ പ്രസ്താവനകൾക്ക് മറുപടി നൽകേണ്ട കാര്യം തനിക്കില്ലെന്നും അതിനെക്കുറിച്ച് പത്മകുമാറിനോട് തന്നെ ചോദിക്കണമെന്നും അദ്ദേഹം വ്യക്തമാക്കി. പുതിയ സർക്കാർ ഭരണം തുടങ്ങി ഒരു മാസത്തിനുള്ളിൽ രണ്ട് രാജികളാണ് ഉണ്ടായത്. ജനകീയ പ്രതിഷേധത്തെ തുടർന്നാണ് ബെന്നി രാജിവച്ചത്. സർക്കാരിന്റെ ഭാഗത്തുനിന്നുണ്ടായ സ്വജനപക്ഷപാതത്തിന് മറുപടി നൽകാൻ കോൺഗ്രസ് ഇതുവരെ തയ്യാറായിട്ടില്ലെന്നും അദ്ദേഹം ചൂണ്ടിക്കാട്ടി.
