പത്തനംതിട്ട: ശബരിമല സ്വര്‍ണക്കൊള്ള കേസില്‍ അന്തിമ റിപ്പോര്‍ട്ടും കുറ്റപത്രവും സമര്‍പ്പിക്കുന്നതിന് മുന്നോടിയായി സന്നിധാനത്തെ ശ്രീകോവില്‍ കട്ടിളപ്പാളികളില്‍ ഇന്നും നാളെയും എസ്‌ഐടി പരിശോധന നടത്തും. മിഥുന മാസ പൂജകള്‍ക്കായി ഇന്ന് വൈകിട്ട് 5ന് നട തുറന്ന ശേഷം കട്ടിളപ്പാളികള്‍ക്കൊപ്പം പ്രഭാമണ്ഡലവും ഇളക്കി മാറ്റിയാണ് പരിശോധന. പാളികളില്‍ നിന്നും നഷ്ടമായ സ്വര്‍ണത്തിന്റെ അളവ് നിര്‍ണയിക്കാനാണിത്. നേരത്തെ പ്രഭാമണ്ഡലം പരിശോധിക്കാന്‍ ശ്രമിച്ചെങ്കിലും പാളി ഇളക്കാന്‍ കഴിയാഞ്ഞതിനാല്‍ ശ്രമം ഉപേക്ഷിക്കുകയായിരുന്നു. ഇക്കുറി വിദഗ്ധരെ എത്തിച്ച് ഭിത്തിയില്‍ നിന്ന് വേര്‍പെടുത്തിയെടുക്കാനാണ് നീക്കം. ദേവസ്വം ഉന്നത ഉദ്യോഗസ്ഥരുടെ സാന്നിധ്യത്തിലാവും പരിശോധന.
2019ല്‍ വിജയ്‌മല്യ സ്ഥാപിച്ച ചെമ്പ് തകിടുകള്‍ തന്നെയാണ് കട്ടിളപ്പാളികളില്‍ ഉള്ളതെന്ന് ജംഷഡ്പൂരിലെ നാഷണല്‍ മെറ്റലര്‍ജിക്കല്‍ ലബോറട്ടറിയില്‍ നടത്തിയ പരിശോധനയില്‍ കണ്ടെത്തിയതായാണ് സൂചന. എന്നാല്‍ ദ്വാരപാലക ശില്‍പപാളികളിലെ ചെമ്പിന്റെ സ്ഥിതിയെന്തെന്ന് എസ്‌ഐടി വ്യക്തമാക്കിയിട്ടില്ല. 2019 സപ്തംബര്‍ 30ന് ചെന്നൈയില്‍ എത്തിച്ചത് ചെമ്പില്‍ തീര്‍ത്ത ദ്വാരപാലക പാളികളായിരുന്നു എന്നാണ് കഴിഞ്ഞ സപ്തംബറില്‍ സ്മാര്‍ട്ട് ക്രിയേഷന്‍സ് സിഇഒ പങ്കജ് ഭണ്ഡാരി ദേവസ്വം വിജിലന്‍സിനോട് വെളിപ്പെടുത്തിയത്. ഇതില്‍ സ്വര്‍ണത്തിന്റെ അംശം ഇല്ലായിരുന്നു എന്ന് സ്മാര്‍ട്ട് ക്രിയേഷന്‍സിന്റെ അഭിഭാഷകന്‍ കെ.ബി. പ്രദീപും വെളിപ്പെടുത്തിയിരുന്നു. എന്നാല്‍ എസ്‌ഐടിയുടെ ചോദ്യം ചെയ്യലില്‍ പങ്കജ് ഭണ്ഡാരി മൊഴിമാറ്റിയിരുന്നു. ഇതില്‍ ദുരൂഹതയുണ്ടെന്ന് നേരത്തെതന്നെ സംശയം ഉയര്‍ന്നിരുന്നു.
