കരുനാഗപ്പള്ളി: കേരളത്തില് വ്യാപകമായി പിടികൂടുന്ന ബംഗ്ലാദേശികളുടെ കൈകളില് ഉള്ള വ്യാജ രേഖകള് ഒറിജിനലിനെ പോലും വെല്ലുന്നത്. ഇത് ചില്ലറ ബുദ്ധിമുട്ടുകളല്ല പോലീസിന് സൃഷ്ടിക്കുന്നത്. രാജ്യത്തിന്റെ അതിപ്രധാന രേഖപോലും കൃത്രിമമായി നിര്മിക്കുന്നത് പോലീസില് ഞെട്ടലുണ്ടാക്കുന്നു.
ഇതരസംസ്ഥാന തൊഴിലാളികള്ക്കിടയില് ഉള്ള ബംഗ്ലാദേശി പൗരന്മാരെ കണ്ടെത്തുന്നതിനായി നടത്തുന്ന പരിശോധനയില് അവരുടെ കൈവശം ഉള്ള രേഖകള് വച്ച് കണ്ടെത്താന് കഴിയുന്നില്ലെന്നാണ് പോലീസ് പറയുന്നത്.
ഭാഷയും, ജീവിതരീതിയും എല്ലാം സ്വദേശികളായ ബംഗാളികള്ക്ക് സമാനമായതും ഇവരെ തിരിച്ചറിയാന് പ്രയാസമുണ്ടാക്കുന്നു. ഇവര് സ്ഥിരമായി ഒരിടത്തു തന്നെ കഴിയാതെ മാറിമാറി പാര്ക്കുന്ന രീതി സ്വീകരിച്ചിട്ടുള്ളതിനാല് അന്വേഷണവും കാര്യക്ഷമമാകുന്നില്ല. കരുനാഗപ്പള്ളി കേന്ദ്രീകരിച്ച് വ്യാജ സര്ക്കാര് രേഖകള് നിര്മിച്ചു നല്കുന്ന പ്രാദേശിക ശൃംഖലകള് സജീവമാണെന്ന് കണ്ടെത്തി. കേരളത്തില് അനധികൃതമായി താമസിക്കുന്ന വിദേശികള്ക്ക് ഭാരത പൗരത്വ രേഖകള് സംഘടിപ്പിച്ച് നല്കുന്ന വലിയൊരു പ്രാദേശിക മാഫിയയുടെ വിവരങ്ങളാണ് പുറത്തുവരുന്നത്. ഈ സംഘത്തിന്റെ പ്രധാന താവളവും രേഖകള് ചമച്ച കേന്ദ്രവും കരുനാഗപ്പള്ളി ആയിരുന്നുവെന്ന് പോലീസ് അന്വേഷണത്തില് വ്യക്തമായിട്ടുണ്ട്. കരുനാഗപ്പള്ളിയിലെ ചില പ്രാദേശിക വ്യക്തികളും തൊഴിലുടമകളും ഏജന്റുമാരും അടങ്ങുന്ന സംഘമാണ് ഇവര്ക്ക് നിയമവിരുദ്ധമായി എല്ലാവിധ സര്ക്കാര് രേഖകളും ഒരുക്കി നല്കിയത്.
കരുനാഗപ്പള്ളി മേഖലയിലെ ആക്രിക്കടകളിലെ തൊഴിലാളികളായാണ് ഇവര് ആദ്യം എത്തിച്ചേര്ന്നത്. ഈ സ്ഥാപനങ്ങളും അതിന്റെ ഉടമസ്ഥരും നല്കിയ തൊഴില് പശ്ചാത്തലവും താവളവും ഇവര്ക്ക് ദീര്ഘകാലം ഇവിടെ സുരക്ഷിതമായി തുടരാന് മറയായെന്ന് പോലീസ് പറയുന്നു.
പോലീസ് കണ്ടെത്തിയ വിവരങ്ങള് അനുസരിച്ച് വളരെ ആസൂത്രിതമായ രീതിയിലാണ് പ്രാദേശിക സംഘങ്ങള് ഇവരെ സഹായിച്ചത്. കരുനാഗപ്പള്ളിയിലെ കാട്ടില്കടവ്, നീണ്ടകര മേഖലകളില് എത്തിയശേഷം, പ്രാദേശിക ഏജന്റുമാരുടെ സഹായത്തോടെ ഈ വ്യാജ ആധാറിലെ വിലാസം ഇവിടുത്തെ പ്രാദേശിക വിലാസമാക്കി മാറ്റി യഥാര്ത്ഥ ആധാര് കാര്ഡുകള് കൈക്കലാക്കി.
കരുനാഗപ്പള്ളിയിലെ വിലാസത്തിലുള്ള ആധാര് കാര്ഡ് കൈവന്നതോടെ, അത് അടിസ്ഥാന രേഖയാക്കി കാണിച്ച് വോട്ടര് ഐഡിയും റേഷന് കാര്ഡും ബാങ്ക് അക്കൗണ്ടും കാരുണ്യ കാര്ഡും വരെ ഈ സംഘം ഇവര്ക്ക് എളുപ്പത്തില് സംഘടിപ്പിച്ചു നല്കി. കരുനാഗപ്പള്ളി കേന്ദ്രീകരിച്ച് പ്രവര്ത്തിക്കുന്ന ആക്രി സ്ഥാപനങ്ങളുടെ ഉടമകള്, തദ്ദേശീയരായ ഇടനിലക്കാര് എന്നിവരടങ്ങുന്ന ഒരു വലിയ റാക്കറ്റ് തന്നെ ഈ നിയമവിരുദ്ധ പ്രവര്ത്തനത്തിന് പിന്നിലുണ്ടെന്നാണ് വ്യക്തമാകുന്നത്. രാജ്യസുരക്ഷയെപ്പോലും ബാധിക്കുന്ന രീതിയില് വിദേശ പൗരന്മാര്ക്ക് ഭാരതത്തിലെ വിലാസത്തില് റേഷന് കാര്ഡും വോട്ടര് ഐഡിയും വരെ ലഭ്യമാക്കാന് കരുനാഗപ്പള്ളിയിലെ ഈ പ്രാദേശിക സംഘങ്ങള് വഴിവിട്ട സഹായം നല്കിയിട്ടുണ്ട് എന്നത് ഗൗരവമേറിയ വിഷയമാണ്.
കേരളത്തിലെ മുക്കിലും മൂലയിലും കുടിയേറി കഴിയുന്ന ഇതര സംസ്ഥാന തൊഴിലാളികളിലെ ഭീകരവാദികളെ കണ്ടെത്താന് ജില്ലകള് തോറും പ്രത്യേക സംഘം രൂപീകരിച്ചെങ്കില് മാത്രമെ കാര്യമായി പ്രവര്ത്തിക്കാന് കഴിയൂ എന്നാണ് വിലയിരുത്തല്. പോലീസിന്റെ ഭാഗത്തുനിന്നും വീഴ്ച ഉണ്ടായാല് എന്ഐഎ പോലുള്ള കേന്ദ്ര ഏജന്സികള് പിടിമുറുക്കുമെന്ന ആശങ്കയിലാണ് പോലീസ്.
ജന്മഭൂമി ഓണ്ലൈന്