തൃശൂര്: പൂങ്കുന്നത്തെ ഒരു വീടിനുള്ളില്നിന്നും വാഹനങ്ങളില്നിന്നുമായി കണ്ടെത്തിയത് 18 മലമ്പാമ്പിന്കുഞ്ഞുങ്ങളെ. പൂങ്കുന്നം എംജി നഗര് കൃഷ്ണനിലയം കാര്ത്തിക്കിന്റെ വീട്ടില്നിന്നാണ് ഇന്നും ഇന്നലെയുമായി പാമ്പിന് കുഞ്ഞുങ്ങളെ പിടികൂടിയത്.
കഴിഞ്ഞദിവസം വീടിന്റെ തറയില് ഒരു പാമ്പിന്കുഞ്ഞ് ഇഴഞ്ഞുവരുന്നത് വീട്ടുകാര് കണ്ടിരുന്നു. തുടര്ന്ന് പരിശോധിച്ചപ്പോഴാണ് ഇത്രയും പാമ്പിന്കുഞ്ഞുങ്ങളെ കണ്ടെത്തിയത്.
ബൈക്കിന്റെ സീറ്റിനടിയില് നാല് പാമ്പിന് കുഞ്ഞുങ്ങളാണ് ഉണ്ടായിരുന്നത്.സ്കൂട്ടറില്നിന്ന് രണ്ടും കുഞ്ഞുങ്ങളെ കണ്ടെത്തി. ഇരുവാഹനങ്ങളുടെയും സീറ്റുകള് പൂര്ണമായി അഴിച്ചെടുത്താണ് വനംവകുപ്പ് സ്നേക് റെസ്ക്യൂവര്മാര് പാമ്പിന്കുഞ്ഞുങ്ങളെ പിടികൂടിയത്.
വീടിന്റെ തറപൊളിച്ചും പരിശോധന നടത്തി. വീട്ടില് കാര്ത്തിക്കും വയോധികരായ മാതാപിതാക്കളും ഭാര്യയും കുഞ്ഞും അടങ്ങുന്ന കുടുംബമാണ് താമസിക്കുന്നത്.
