തിരുവനന്തപുരം: നരേന്ദ്രമോദി സർക്കാർ മൂന്നാമൂഴത്തിൽ രണ്ടാം വാർഷികത്തിലേക്ക് ഇന്ന് കടക്കുമ്പോൾ വൈകിട്ട് എൻഡിഎയുടെ ദേശീയതലയോഗം ന്യൂദൽഹിയിൽ നടക്കും. മൂന്നു മണിക്ക് ഭാരത് മണ്ഡപത്തിലാണ് യോഗം. അഞ്ചു സംസ്ഥാനങ്ങളിൽ നടന്ന തെരഞ്ഞെടുപ്പിൽ മൂന്നിടത്ത് വൻ വിജയവും കേരളത്തിൽ ആദ്യമായി മൂന്ന് എംഎൽഎമാർ ഉണ്ടായതും അടക്കം ആഘോഷ അന്തരീക്ഷത്തിലാണ് യോഗം.
രാജ്യസഭയിലേക്കുള്ള തെരഞ്ഞെടുപ്പു നടക്കാൻ പോകുന്ന പശ്ചാത്തലവും കണക്കാക്കുമ്പോൾ യോഗത്തിന് പ്രാധാന്യം ഏറുന്നു. രാജ്യസഭാ തെരഞ്ഞെടുപ്പു കഴിയുന്നതോടെ രാജ്യസഭയിലും എൻഡിഎ കൂടുതൽ ശക്തിപ്പെടുകയാണ്. ബിജെപിക്ക് ഒറ്റയ്ക്ക് രാജ്യസഭയിൽ ഭൂരിപക്ഷമാകും.
പ്രതിപക്ഷത്തിന്റെ മുന്നണിയായ ‘ഇൻഡി’ സഖ്യത്തിന്റെ യോഗത്തിനു പിന്നാലെയാണ് ഭരണമുന്നണിയായ എൻഡിഎയുടെ യോഗം. മോദിസർക്കാരിനെതിരേ പൊതു നിരത്തിൽ സമരത്തിന് ആഹ്വാനം ചെയ്താണ് ഇൻഡി മുന്നണി യോഗം പിരിഞ്ഞത്. മുന്നണിയിൽ ഉണ്ടായിരുന്ന രണ്ടു പാർട്ടികൾ പിരിഞ്ഞുപോയതോടെ ശക്തിപ്രകടനം ശക്തിക്ഷയമാണ് പ്രകടിപ്പിച്ചത്. ഇന്നത്തെ എൻഡിഎ യോഗത്തിൽ സർക്കാരിന്റെ 12 വർഷത്തെ നേട്ടങ്ങൾ വിലയിരുത്തും, തുടർ പ്രവർത്തനങ്ങൾ ചർച്ച ചെയ്യും.
