തിരുവനന്തപുരം: സംവിധായകന്‍ ബാലചന്ദ്രകുമാറിന്റെ മരണത്തില്‍ ദുരൂഹതയുണ്ടെന്ന ആരോപണവുമായി കുടുംബ സുഹൃത്ത് എന്നവകാശപ്പെടുന്ന അനന്തു സുരേഷ് മുഖ്യമന്ത്രിക്ക് ഉള്‍പ്പെടെ പരാതി നല്‍കി. തിരുവനന്തപുരം എസ്ഐടി ആശുപത്രി, ചെങ്ങന്നൂരെ സ്വകാര്യ ആശുപത്രി എന്നിവക്കെതിരെയും പരാതിയില്‍ പരാമര്‍ശമുണ്ട്.
ബാലചന്ദ്രകുമാറിനെ മനഃപൂര്‍വ്വം അപകടപ്പെടുത്താന്‍ വേണ്ടി ചില ഡോക്ടര്‍മാര്‍ ഇടപെടലുകള്‍ നടത്തിയെന്നാണ് ആരോപണം. ചില വിവരങ്ങള്‍ തനിക്ക് ലഭിച്ചതായി പരാതിയില്‍ അവകാശപ്പെടുന്നു. വൃക്കയില്‍ കല്ലുണ്ടെന്ന് കണ്ടെത്തുകയും അത് നീക്കം ചെയ്യുന്നതിന് ബാലചന്ദ്രകുമാര്‍ തിരുവനന്തപുരം എസ്ഐടി ആശുപത്രിയില്‍ ചികിത്സ തേടുകയും ചെയ്തിരുന്നു. കല്ല് നീക്കം ചെയ്ത ശേഷം ബാലചന്ദ്രകുമാറിന്റെ ആരോഗ്യസ്ഥിതി മോശമായെന്നാണ് ആരോപണം. തുടര്‍ന്ന് ചെങ്ങന്നൂരിലെ സ്വകാര്യ ആശുപത്രിയില്‍ ചികിത്സയിലിരിക്കെ 2024 ഡിസംബര്‍ പതിമൂന്നിന് ബാലചന്ദ്രകുമാര്‍ മരിച്ചു.
നടിയെ ആക്രമിച്ച് നഗ്‌നദൃശ്യങ്ങള്‍ പകര്‍ത്തിയ കേസില്‍ ബാലചന്ദ്രകുമാര്‍ ഇടക്കാലത്ത് നടത്തിയ വെളിപ്പെടുത്തലുകള്‍ വലിയ വിവാദമായിരുന്നു.
