ലോസ് എഞ്ചല്സ്: ലോകകപ്പ് ഫുട്ബോളില് നോക്കൗട്ടുകള് അങ്കലാപ്പിന്റെ മത്സരങ്ങളാണെങ്കില് ഗ്രൂപ്പ് ഘട്ടങ്ങള് അങ്ങനെയല്ല. ഒന്നില് പിഴച്ചാല് പിന്നെയും അവസരം ഉണ്ടെന്ന ആശ്വാസവും പ്രതീക്ഷയും ഉണ്ടാകും. പൊതുവില് ആവേശക്കാഴ്ച്ചയായി മാറുന്ന ഘട്ടമാണിത്. ചില ഗ്രൂപ്പുകള് പാടെ നിറംമങ്ങിയവയായിരിക്കും. അതരത്തില് നിറംകെട്ട ഗ്രൂപ്പ് ആണ് ഗ്രൂപ്പ് ജി. 2018ലെ റഷ്യന് ലോകകപ്പില് ഇറങ്ങിയ ബെല്ജിയത്തിന്റെ കരുത്തും കഴിവും ഏറെ കൈമോശം വന്നിരിക്കുന്നു. ലോകകപ്പില് നേരത്തെ തന്നെ യോഗ്യത നേടിയ ഒരു ടീം എന്നതിനപ്പുറം എന്തെങ്കിലും വിശേഷമുണ്ടെങ്കില് അത് ഈ ടീം കളിച്ച് തെളിയിക്കേണ്ട ബാധ്യതയുണ്ട്. സൂപ്പര് താരം മുഹമ്മദ് സലാ ഉള്പ്പെടുന്ന ഈജിപ്തിന്റെ സ്ഥിതിയും അതു തന്നെ. എന്നാല് ഈ രണ്ട് ടീമുകളും നോക്കൗട്ടിലേക്ക് മുന്നേറുമെന്ന കാര്യത്തില് സംശയമില്ല. വെല്ലുവിളിയായി ഇറാനുണ്ട്. സാന്നിധ്യമായി ന്യൂസിലന്ഡും.
ബെല്ജിയം
2018ല് മൂന്നാം സ്ഥാനം വരെ മുന്നേറിയതാണ് ഏറ്റവും വലിയ നേട്ടം. സുവര്ണ തലമുറ എന്ന പേരില് അക്കൊല്ലം ഇറങ്ങിയ ടീം കിരീടം ഏറെ അര്ഹിച്ചിരുന്നു. ഇതുവരെ 14 ലോകകപ്പുകളില് സാന്നിധ്യമറിയിച്ചു. റഷ്യന് ലോകകപ്പ് കൂടാതെ 1986ലെ മെക്സിക്കന് ലോകകപ്പിന്റെ സെമിവരെ എത്തിയതാണ് ടീമിന്റെ മറ്റൊരു മികച്ച നേട്ടം. 1934, 1938, 1990, 1994, 2002 ലോകകപ്പുകളില് റൗണ്ട് ഓഫ് 16 വരെ എത്തിയിട്ടുണ്ട്.
ഈജിപ്ത്
ഈ ആഫ്രിക്കന് ടീം പങ്കെടുക്കുന്ന നാലാം ലോകകപ്പ് ആണിത്. 1934ലാണ് ഏറ്റവും വലിയ നേട്ടം ഉണ്ടാക്കിയത്. അന്ന് റൗണ്ട് ഓഫ് 16 വരെയെത്തി. പിന്നീട് രണ്ട് തവണ മാത്രമേ യോഗ്യത നേടിയിട്ടുള്ളൂ. 1990, 2018 ലോകകപ്പുകളിലായിരുന്നു ആ മുന്നേറ്റം.
ഇറാന്
ഇറാന് ഫുട്ബോള് ടീമിന്റെ ആറാം ലോകകപ്പ് ആണിത്. 2014ലെ ബ്രസീല് ലോകകപ്പ് മുതല് സ്ഥിരം സാന്നിധ്യം. സൂപ്പര് താരം മുഹമ്മദ് സലാ ആണ് ശ്രദ്ധേയ താരം. പക്ഷെ താരത്തിന് ലോകകപ്പില് യാതൊന്നും ചെയ്യാന് സാധിച്ചിട്ടില്ല. 1978, 1998, 2006 വര്ഷങ്ങളിലും ലോകകപ്പ് കളിച്ചിട്ടുണ്ട്.
ന്യൂസിലന്ഡ്
മൂന്നാം അവസരത്തിനാണ് ന്യൂസിലന്ഡ് ലോകകപ്പിനെത്തുന്നത്. ഇതിന് മുമ്പ് രണ്ട് തവണ വിശ്വ കാല്പന്ത് പൂരത്തില് പങ്കെടുത്തു. ആറ് മത്സരങ്ങളില് നിന്ന് ഒരു വിജയം പോലും സ്വന്തമാക്കാതെ മടങ്ങി. 1982ലും 2010ലും ടീം കളിട്ടിട്ടുണ്ട്.
