കൊച്ചി: പ്രഥമ ബാസ്കറ്റ്ബോള് ലീഗ് കേരള (ബിഎല്കെ) സീസണ് ഒന്നിന്റെ മൂന്നാം ദിനത്തില് ആവേശപ്പോരാട്ടങ്ങള്. അണ്ടര്-14, അണ്ടര്-19 പെണ്കുട്ടികളുടെ വിഭാഗത്തില് കാലിക്കറ്റ് വാരിയേഴ്സ് തങ്ങളുടെ അപരാജിത കുതിപ്പ് തുടര്ന്നു. അണ്ടര്-19 ആണ്കുട്ടികളുടെ വിഭാഗത്തില് കോട്ടയം ബൈസണ്സും തൃശ്ശൂര് ടസ്കേഴ്സും മികച്ച വിജയങ്ങള് സ്വന്തമാക്കി.
സെമിഫൈനലിസ്റ്റുകളെ നിശ്ചയിക്കാനായി ആറ് ടീമുകള് പങ്കെടുക്കുന്ന റൗണ്ട് റോബിന് മത്സരങ്ങള് കൊച്ചി റീജിയണല് സ്പോര്ട്സ് സെന്റര് ഇന്ഡോര് സ്റ്റേഡിയത്തിലാണ് നടക്കുന്നത്.
രാജീവ് ഗാന്ധി ഇന്ഡോര് സ്റ്റേഡിയത്തില് നടക്കുന്ന ടൂര്ണമെന്റില് അണ്ടര്-14 പെണ്കുട്ടികളുടെ വിഭാഗത്തില് കാലിക്കറ്റ് വാരിയേഴ്സ് 45-34 ന് കൊച്ചി സ്റ്റാലിയന്സിനെ പരാജയപ്പെടുത്തി. കാലിക്കറ്റിനായി ലക്ഷ്മി ടി. 23 പോയിന്റ് നേടി. അണ്ടര്-19 ആണ്കുട്ടികളില് കോട്ടയം ബൈസണ്സ് 53-44 ന് കൊച്ചി സ്റ്റാലിയന്സിനെ കീഴടക്കി. നയുക്ത് സലിലിന്റെ പ്രകടനമാണ് കോട്ടയത്തിന് തുണയായത്. അണ്ടര്-14 ആണ്കുട്ടികളില് കാലിക്കറ്റ് വാരിയേഴ്സ് കൊച്ചിയെയും (72-29), കോട്ടയം ബൈസണ്സ് ആലപ്പുഴയെയും (53-37) പരാജയപ്പെടുത്തി. അണ്ടര്-19 ആണ്കുട്ടികളില് തൃശ്ശൂര് ടസ്കേഴ്സ് 61-41 ന് ആലപ്പുഴ ഡോള്ഫിന്സിനെ തകര്ത്തു. തൃശ്ശൂരിന്റെ വിനയ് ശങ്കര് 21 പോയിന്റും 10 റീബൗണ്ടുകളുമായി തിളങ്ങി.
